Zelenskî ragihand ku dema şer bi dawî bibe ewê dest ji erka xwe berde.
Her wiha hat ragihandin Ukrayna piştî şer ji bo hilbijartinan qanûnek taybet amade dike.
Serokomarê Ukraynayê Volodimir Zelenskiy ragihand ku piştî bidawîbûna şer, ew ne di wê baweriyê de ye ku rêveberiya welêt bidomîne.
Zelenskî diyar kir ku eger agirbest pêk were, ew ê serî li Parlamentoya Ukraynayê bide ji bo organîzekirina hilbijartinan.
Zelenskiy got:
“Armanca min ew e ku şer bi dawî bibe, ne ku careke din bibim namzetê peywirê.”
Her wiha Zelenskiy destnîşan kir ku di hevdîtina xwe ya bi Serokê Amerîkayê Donald Trump re jî ev mijar gotûbêj kiriye û got:
“Eger agirbest çêbibe, em dikarin vê demê binirxînin û ez dikarim sînyaleke wiha bidim parlamentoyê.”
Zelenskî teqez kir ku civak dibe ku ji bo aştiyeke demdirêj bixwaze “lîderekî xwedî desthilatdariyeke nû” bibîne.
“Li Ukraynayê ji bo hilbijartinên piştî şer qanûnek taybet tê amadekirin”
Lê belê wî got ku pirsgirêkên ewlehiyê dikarin organîzekirina hilbijartinan zehmet bikin, her çendî ew bawer dike ku ev yek mimkûn e.
Zelenskiy berê jî gotibû ku di dema şer de gotûbêjên hilbijartinan tenê “tevlihevî û dirûşmên siyasî” derdixin holê û got:
“Bila derfetê bidin min ku şer bi dawî bikim, bila dewlet berî şer neyê parçekirin. Hemû daxwaza min ev e.”
Ji aliyê din ve, Serokê Parlamentoya Ukraynayê Ruslan Stefançuk ragihand ku ji bo hilbijartinên piştî şer qanûneke taybet tê amadekirin.
Stefançuk diyar kir ku şertên bidawîbûna şer û dema wê dê ji bo welêt zehmetiyan derxîne, lê ew bawer dike ku ji bo ku gel bikaribe mafê xwe yê hilbijartinê yê destûrî bikar bîne, “lihevkirineke qanûnî ya rast” dê were dîtin.
Zelenskiy: Eger Rûsya nesekine, Ukrayna amade ye ku êrîşî kremlînê bike
Ji aliyê din ve Zelenskiy diyar kir ku ji ber ku Ukrayna “ne terorîst e”, ew niyeta bombebarankirina sivîlên Rûs nade, lê wî îma kir ku ew difikire êrîşî navendên hêza Rûs ên wekî Kremlînê bike.
Di hevpeyvîna xwe ya bi kanala amerîkî Axios(aksiyos) re, Zelenskiy derbarê rayedarên Kremlînê de got:
“Divê ew zanibin stargeh kuderê ne. Pêdiviya wan bi vê yekê heye. Tew şer nesekinînin jî, dîsa dê pêdiviya wan pê hebe.
Divê ew zanibin ku em ê her roj bersivê bidin. Eger êrîşî me bikin, em ê jî bersivê bidin.”
Zelenskiy got ku ji Trump daxwazeke taybet kiriye: Sîstemeke nû ya çekan ku Pûtîn bîne ser maseya danûstandinan.
