Saziya Parastina Zarokan a Swêdê hikumeta welat şermezar kir ku guh nade banga Netewên Yekbûyî a ji wergirtina welatiyên xwe yên li Kampa Holê û got ku wergirtina zarokan tenê ji Kampa Holê ne karekî hiqûqî ye.
Komîteya navdewletî ya Xaça Sor jî bang li welatan kir, welatiyên xwe yên li Kampa Holê wergirin.
Di nav welatên Ewropayê de, herî zêde ji Swêdê kes tevlî nav çeteyên DAIŞ’ê bûne.
Piştî ku DAIŞ’ê êrîşên xwe yên li Iraq û Sûriyê da destpêkirin, nêzî 300 kes tevlî nav refên DAIŞ’ê bûn.
Swêd ji bo ku ev kesên ji bo wê bûne pirsgirêk rizgar bibe, mirov dikare bibêje ku çûna wan a ji bo Sûriye û Iraqê hêsan kiribû.
Li gorî texmînan kesên ji Swêdê tevlî nav refên DAIŞ’ê bûne, 50 kes mirine û 150 kes jî vegeriyane Swêdê.
Di girtîgehên QSD’ê de jî tê diyarkirin ku 15 çeteyên DAIŞ’ê yên hemwelatiyên Swêdê hene.
Li Kampa Holê nêzî 20 jin û 30 zarokên çeteyan hene û nîqaşên li ser van kesan di rojeva Swêdê de cihekî girîng digire.
Di meha sibatê de Neteweyên Yekbûyî name ji 57 welatan re şandibû yên ku hemwelatiyên wan li kampên El Hol û Rojê hene û xwestibû ku bila ev welat hemwelatiyên xwe werbigirin.
Hikûmeta Swêdê nameyek weşandibû û diyar kiribû ku armanca wan ew e ku zarokên çeteyan ên hemwelatiyên Swêdê vegerînin welat, lê ti berpirsyariya wan nîne ku ew dayikên van zarokan bînin Swêdê.
Her dawî jî, Saziya Parastina Zarokan a Swêdê diyar kir ku heke zarok ji diyên xwe werin veqetandin ev ne alternatîf e û di warê hiqûqî de jî ne mimkun e.
Rêveberiya Xweser a Bakur û Rojihlatê Sûriyê gelek caran ji hikumeta Swêdê re ragihandiye ku heke zarok û diyên xwe werin veqetandin ev sûcekî dermirovahiyê ye.
Xaça Sor a navdewletî bang li welatan kir ku welatiyên xwe wergirin
Li aliyê din jî, Komîteya navdewletî ya Xaça Sor, bang li welatan kir, ku 62 hezar welatiyên xwe yên malbatên çeteyên DAIŞ’ê yên li Kampa Holê wergirin.
Serokê Komîteyê Peter Maurer, piştî serdana xwe bo kampê diyar kir, ku bi hezaran zarok li kampa Holê û kampên din hene û piraniya wan sêwî yan jî dûrî dê û bavên xwe dijîn.
Maurer banga bidawîanîna vê trajediyê û wegirtina van kesan kir.
