Hikumeta Alman li xwe mikur hat ku di salên dawî de xebatên MÎT’a Tirk ên ji bo sîxurtiyê li welatê wan zêde bûye. Li gorî texmînan li Elmanyayê 8 hezar kes ji MÎT’ê re dixebitin. Derbarê xebatên sixûrtiya MÎT’a Tirk a li Elmanyayê de heta niha 10 lêpirsîn hatine vekirin, lê ti doz nayên vekirin.
MÎT’a Tirk, xebatên xwe yên sixûrtiyê ne tenê li Kurdistanê, belavî gelek welatan kiriye.
Yek ji wan welatan jî ku MÎT bi hêsanî xebatên sîxuriyê lê dimeşîne Almanya ye.
Hikumeta Alman li xwe mikur hat ku di salên dawî de xebatên MÎT’a Tirk a ji bo sîxurtiyê zêde bûye.
Li Almanyayê, MÎT’ê ji ser mizgeft, konsolosxane, şaxên bankayan û gelek saziyan tora sîxurtiyê ava kiriye.
Derbarê xebatên MÎT’a Tirk a li Almanyayê de 10 lêpirsîn hene, lê doz nayên vekirin
Têkildarî liv û tevgera MÎT’a Tirk, Parlementera Partiya Çep a Almanyayê Sevîm Dagdelen pirsanemeyek pêşkeşî hikûmetê kir û ev yek xist rojeva Meclîsa Federal.
Hikumetê bersiv da pirsnameyê û diyar kir ji ber xebatên sîxurtiyê yên MÎT’ê di sala 2020’an de 4 û di sal 2021’an de jî 6 lêpirsîn hatine destpêkirin.
Hikumetê da zanîn derbarê du lêpirsînên par de biryara ‘neşopandinê’ hatiye dayîn.
Lê derbarê hurguliyên lêpirsînan de tiştek nehate eşkerekirin.
Tevî tevgera MÎT’ê ya li welat tê zanîn jî heta niha ti doz nehatine vekirin.
Derbarê mijarê de Sevîm Dagdelen ji rojnameya Weltê re axivî û ji ber ku li hemberî xebatên MÎT’ê tiştekî nake, rexne li hikumeta Alman kir.
MÎT bêdengiya dewleta Elmanyayê ji xwe re kiriye firsend û ji sala 2016’an û vir ve xebatên xwe yên sîxurtiyê zêde kiriye.
Li Almanyayê 8 hezar kes ji MÎT’ê re dixebitin
Li gorî texmînan li Almanyayê 8 hezar kes ji MÎT’ê re dixebitin.
Bêguman armanca wan ya sereke ji van xebatan, tasfiyekirina Tevgera Azadiyê ya Kurdistanê ye.
MÎT’a Tirk bi rêka sîxûrên xwe pêşengên ji bo azadiya gelê Kurd têdikoşin hedef digre.
Herî dawîn di meha Cotmehê de hemwelatiyekî Tirk li oteleke Dusseldorfê tevî fîşek û lîsteya navan hatibû binçavkirin.
Hatibû diyarkirin ev kes ji MÎT’ê re dixebite.
Di xebatên MÎT’ê de saziya diyanetê ya Tirk rolekî mezin dilîze
Di xebatên îstîxbaratê de saziya bi navê Yekîtiya Tirk Îslam a Karên Diyanetê-DÎTÎB roleke mezin dilîze.
900 mizgeftên wê hene û meleyên li van camiyan agahiyên derbarê mûxalifên rejîma Erdogan yekser radigihînin konsolosxane û balyozxaneyan.
Di serê sala 2017’an de li hemberî hin meleyên endamên yekîtiyê lêpirsîn dabû destpêkirin.
Di vê lêpirsînê de qet gav nehatibû avêtin û hatibû ragihandin di Kanûna 2017’an de dosye hatiye girtin.
Lêpirsîna li ser 19 xebatkarên yekîtiyê jî piştî bazariya di navbera Berlîn û Enqereyê de, hatibû girtin.
