Yekîtiya Ewropa ji bo piştevaniya xwe ya bi Ûkrayna re diyar bike, berpirsê xwe şand sînorê Kîevê. Nûnerê Bilind ê Têkliyên Derve û Parastinê yê YE Borrell di dema serdana xwe de got: Heta Ûkrayna parastî nebe, Ewropa nikare parastî be. Ji Almanya û DYA jî peyama piştevaniya Ûkrayna hate dayîn. Aliyan got, Zêdekirina jimara leşkerên Rûsya li sînorê Ûkrayna, gefeke eşkere ya li dijî Ewropa ye.
Nûnerê Bilind ê Têkiliyên Derve û Polîtîkayên Ewlekariyê yên Yekîtiya Ewropayê (YE) Josep Borrell û Wezîrê Karên Derve yê Ûkraynayê Dmîtro Kuleba serdana xeta têkiliyê ya li bajarê Luganskê yê li rojhilatê Ûkraynayê kirin.
Piştî serdanê Borrell u Kuleba civîneke çapemeniyê li dar xistin.
Josep Borrell anî ziman ku ev serdan firsendeke ji bo şahidiya encamên şerê 8 salan.
Borrell diyar kir ku YE şirîkê herî pêbawer ê Ûkraynayê ye û piştî Rûsya bi rêyên neqanûnî Kirim kontrol kir bêtirî 17 milyar euro alîkariya aborî ji bo Kîevê kirine.
Borrell bal kişand ser vê yekê ku Peymana Yekîtiyê ya wan bi Ûkraynayê re peymana herî berfireh e.
Borrell îşaret bi tevgera Rûya li sînorê welat kir û got:
Di demekî kin de, Rûsya hêzeke zêde li herêmê bicih kiriye.
Armanca me ya sereke li vir, kêmkirina aloziya heyî ye.
Kuleba: Li dijî Rûsya em li ser paketeke nû ya cezayan dixebitin
Her wiha Kuleba balkişand li ser wê yekê ku YE û Ûkrayna mil bi mil li hember helwêstên êrîşker ên Rûsyayê radiwestin û got:
Erkê me yê hevbeş ew e ku bi rêya danûstandinan aloziyan kêm bikin û Rûsyayê ji helwesta wê ya tundrew dûr bixe.
Ji ber vê yekê em li ser pakêteke nû ya cezayên li dijî Rûsyayê dixebitin.
“Zêdekirina hêzên Rûsya li sînorê Ûkrayna gefek li dijî Ewropa ye”
Li Waşîngtonê jî rojevek sereke rewşa li sînorê Ûkrayna bû.
Wezîra Karên Derve ya Almanyayê Annalena Baerbock li Washingtonê bi Wezîrê Derve yê Amerîka Antony Blinken re hevdîtin pêk anî.
Di daxuyaniya piştî hevdîtinê de hat diyarkirin ku her du welat li dijî Rûsyayê di eniyeke hevpar de ne.
Blinken di civîna çapemeniyê de got,
“Hem Almanya û hem jî Amerîka, kiryarên Rûsyayê yên li dijî Ûkraynayê ji bo aştî û îstiqrara Ewropayê wek xeteriyeke lezgîn dibînin.”
Wezîra Almanyayê Baerbock jî got:
“Me careke din teqez kir ku kiryar û çalakiyên Rûsyayê bihayekî zelal û eşkere heye û ji nûve binpêkirina serweriya Ûkraynayê ji aliyê Rûsyayê ve wê encamên giran bi xwe re bîne.”
Hikûmeta ku li Almanyayê hat ser kare, li gorî dema Angela Merkel di axaftinên xwe yên li dijî Rûsyayê de zimaneke tundtir bikar tîne.
