Bi armanca çareserkirina aloziya Ûkrayna, doh danûstandinên Amerîka û Rûsyayê li Cinivê dest pê kirin.
Berpirsê şandeya Rûs Sergey Rybakov eşkere kir ku hevdîtina pêşî ya aliyan nehêsan bû û got,
Tevî vê yekê jî em di mijara peydakirina çareseriyê de ciddî ne.
Danûstandin wê îro jî dewam bikin.
Bi mijara aloziya Ûkrayna, “hefteya dîplomasiyê” îro fermî destpêkir.
Ev trafîka ku weke hewldanên zor tê binavkirin di navbera Washington, Mosko û Brûkselê de pêk tê.
Doh êvarê bi vê armancê li bajarê Siwîsreyê Cinivê şandeyên Amerîka û Rûsyayê kom bûn.
Cîgirê Wezîrê Karê Derve û serokê şandeya Rûsyayê Sergey Rybakov hevdîtina pêşî weke zor binav kir û got;
Nîqaşeke bi girêk di navbera aliyan de destpêkir. Divê were zanîn ku ev danûstandin wê nehêsa bin.
Lê tevî vê yekê jî ciddî bûn. A girîng ew e ku ev dema ji bo me hatiye veqetandin baş bikar bînin û bi tiştên vala re mijûl nebin.
Wendy Sherman: Em ê piştgiriyê bidin rêgezên navneteweyî
Berpirsa şandeya Amerîkî Wendy Sherman (Wendî Şîrman) jî ji aliyê xwe ve civîna pêşî ya herdû aliyan wiha nirxand:
Amerîka wê piştgiriyê bide rêgezên navneteweyî. Bi taybet jî di mijara aramiya herêmê û rêzgirtina ji bo azadiya biryararê ya welatan.
Sherman di vî warî de îşaret bi wê yekê kir mi mafê Ûkrayna heye hevalbendên xwe hilbijêre û daxwaza endametiya NATO’yê bike.
Blinken: Li gorî helwesta pûtîn, wê Amerîka rêya xwe diyar bike
Di vê navberê de Wezîrê Karê Derve ê Amerîkayê Antony Blînken jî beriya danûstandin destpê bikin Rûsya hişyar kir û got;
Hewldan hene ku alozî bi rêya diyalog û dîplomasiyê werin çareserkirin.
Li gorî helwesta Putin a li dijî Ûkrayna, wê Amerîka jî rêya xwe diyar bike.
Pisporên Dîplomasiyê: Ne pêkan e ku çareseriyek ji hevdîtinan derkeve
Danûstandinên Amerîka û Rûsyayê wê îro jî dewam bikin.
Di hevdîtinan de wê daxwazên Rûsyayê werin gotûbêjkirin.
Lê ji niha ve diyar e ku wê ev mesele bi hêsanî neyê çareserkirin.
Lewma Amerîka û Ewrûpay li dijî daxwazên Rûsyayê helwest nîşan dan.
Vê gavê tişta ku Rûsya herî zêde li dij e, mijara endametiya Ûkrayna a NATO ye.
Amerîka jî vê daxwazê weke mafekî rewa dibîne.
Ji ber van nakokiyan, çavdêrên dîplomatîk ne libendê ne ku ji van hevdîtinan çareseriyek derkeve.
Berovajî dikare rê li ber hilweşîneke mezin veke.
