Rewşa li nava Ûkrayna aloz dibe û jimara kesên têne kuştin her ku diçe zêde dibe. Jimara qurbaniyên ji ber êrişa Rûsya ya li ser Sûmî derket 22’an. Her wiha bêtirî 2 milyon Ûkraynî heta niha koçberî sînorê welatên cîran bûye. Sererkaniya Ûkrayna ragihand ku heta niha bêtirî 12 hezar leşkerên Moskow hatine kuştin. Di vê navberê de, pêşniyara Polonya ya ji bo dayîna balafirên şer ji Ûkraynayê re ji aliyê DYA ve hate redkirin.
Ji 24’ê Sibatê roja êrişa Rûsya li dijî Ûkrayna dayî despêkirin û heta niha, rewşa li welat eve.
Metirsî, wêranî û koçberî.
Rûsya herî zêde herêmên rojhilatê welat dike armanca êrişên xwe.
Bajarê Sûmî û Xarkîv bajarên ku herî zêde wêranî lê pêk hatî ye.
Bîlançoya qurbaniyên êrişa Rûsya ya li ser bajarê Sûmî giran dibe.
Serokê Rêveberiya Leşkerî ya Herêma Sûmî ya Ûkraynayê Dmitri Jivitskiy li ser rûpela xwe ya medya civakî diyar kir ku duh 3 caran herêma Sûmî hatiye bombekirin.
Di van êrîşên hewayî yên Rûsyayê de 3 jê zarok 22 kesan jiyana xwe ji dest dane.
Li 6 bajaran agirbesta demkî hat ragihandin
Agirbesta demkî ya îro ku ji aliyê Wezareta Parastinê ya Rûsyayê ve ji bo derxistina sivîlan ji bajarên Kîev, Xarkov, Çernîhîv, Sûmî û Marîûpolê hatibû ragihandin saet 10:00’an li gorî dema Moskow despê kir.
Ji ber şerê li welat heta niha bêtirî 2 milyon kes koçberî welatên cîran bûye.
Ûkrayna: Bêtirî 12,000 leşkerên Rûsya hatine kuştin
Serfermandariya Ûkraynayê ragihand ku hejmara leşkerên Rûsyayê yên di şer de hatine kuştin bêtirî 12 hezarî ye.
Sererkaniya Ûkrayna bi daxuyaniyekê agahiyên nû yên li ser şerê li welat da.
Li gorî vê; Ji mara leşkerên Rûsya yên hatine kuştin, 12 hezar derbas kiriye.
Her wiha 49 balefir, 81 helîkopter, 317 tank, 1070 wesayitên zirxî, 120 sîstemên topan, 482 wesayit, 60 tankên sotemeniyê û 7 balafirên bêmirov ên Rûsyayê hatin bêkêrkirin.
DYA pêşniyara Polonya ya dayîna balafirên şer bû Ûkrayna red kir
Di vê navberê de, hêviya Ûkrayna ya bûyîna xwediyê balafirên şer têk diçe.
Dewletên Yekbûyî yên Amerîka (DYA) pêşniyara hevalbenda NATOyê ya Polonya red kir ku balafirên şer ên MiG-29 yên Rûsyayê bide Ûkrayna.
DYA ragihand ku firîna balafirên şer ji axa NATO’yê ber bi herêma şer ve bûye sedema “fikara cidî” ji bo tevahiya yekîneyê.
Pêşniyar doh ji aliyê Polonya ve hatibû kirin.
Wezareta Karên Derve ya Polonyayê got, “Polonya amade ye hemû balafirên xwe yên MiG-29 tavilê û bêpere van balafiran bixe xizmeta hikûmeta Amerîkayê.”
Plana Polonya ya şandina balafiran bo Ûkraynayê ji aliyê Berdevkê Pentagonê John Kirby ve hat redkirin.
Di daxuyaniyê de hat destnîşankirin ku DYA hewl dide sewqiyata çekan a ji bo Ûkraynayê bi lez bike.
Lê firîna balafirên şer ên ji xaka NATO’yê ber bi herêma şer ve weke ‘fikara hemû NATO’yê’ hat binavkirin.
https://youtu.be/T4e3dRyg4SA
