Bi boneya salvegera 11. a destpêkirina aloziya li Sûriyê , Meclisa Sûriya Demokratîk, Meclisa Jinan a Sûriyê û Meclisa giştî ya PYD’ê daxuyaniyên cuda dan.. Di daxuyaniyan de hat gotin, “Dawîanîna li dagirkeriyê, û avakirina sîstemeke nenavendî û demokratîk ji hîmên sereke yên çareseriyê ne..”
îro, 15’ê adarê, salvegera 11.a destpêkirina aloziya Sûriyê ye..
Bi vê boneyê, gelek daxuyanî ji aliyê rêxistin û tevgerên bakurê rojhilatî sûriyê ve hatin dayîn.
Meclisa Sûriya Demokratîk MSD’ê bi boneya salvegera 11’an a destpêkirina şerê Sûriyê, daxuyaniyek da.
MSD’ê di daxuyaniyê de anî ziman 11 sal di ser destpêkirina şer re derbas dibin û wiha domand:
“Çirûska şerê li Dera dest pê kir, bi lez li tevahî bajar û bajarokên Sûriyê belav bû.
Beriya vî şerî bi salên dirêj têkoşîna li dijî zordariyê hebûn.
Welatiyên Sûriyê ji ber siyasetên dermirovî yên rejîmê gelek azar kişandin.”
MSD’ê destnîşan kir ku Desthilata Şamê berpirsê karesatên mirovî yên li Sûriyê ye û wiha domand :
“Berpirsê yekemîn ê kuştin, wêrankirin û koçberkirinê, desthilata Şamê ye.
Wê hemû însiyatîfên diyaloga hundirîn a bi armanca çareserkirinê red kirin û krîz mezintir kir.”
Meclisa Sûriya Demokratîk-MSD’ê dawiyê tekez kir divê hemû aliyên muxalif ên demokratîk li ser nêrînek giştî û nexşerêyekê bicivin da ku ji vê krîzê rizgar bibin.
Meclisa Jinan a Sûriyê: Divê jin beşdarî danûstendinên ji bo çareseriyê bibin
Bi heman armancê Meclisa Jinan a Sûriyê jî daxuyaniyek da.
Meclisê diyar kir piştî şerê bi salan, dem hatiye ku hemû aliyên Sûrî fêm bikin pêwîst e tevahî pêkhateyên Sûriyê cihê xwe di diyalogan de bigirin.
Meclisê banga çalakkirina rola jinan di danûstandinan de û avakirina şandeyeke jinan ji bo danûstandinên li Cinêvê kir.
Meclisa giştî ya PYD: Bi dawîkirina dagirkeriyê ji hîmên bingehîn ên çareseriyê ye
Herwiha Meclisa Giştî ya Partiya Yekitiya Demokratîk-PYD’ê jî bi boneya salvegera 11`an a destpêkirina aloziya Sûriyê daxuyaniyek da.
Meclisê di daxuyaniya xwe diyar kir ku tevî derbasbûna 11 salan lê aloziya li welat berdewam e, ev alozî veguherî şerekî hundirîn û pêre aloziyeke navneteweyî ku hêzên cîhanî jî raste rast destwerdan kirin..
Meclisê balkişand ser encamên ku vê aloziyê û şer bi xwe re anîn jî û got:
“Nîvê gelê Sûriyê li hundir û derve koçber bû, binesaziya welêt wêran bû û ji ber cezayên navneteweyî aboriya Sûriyê hilweşiya û niha tenê gel berdêla vê yekê dide.”
Meclisê di daxuyaniyê de balkişand ser gelên li Rojava û Bakur û Rojhilatê Sûriyê ku xwe parastin û xeta sêyemîn a dûrî desthilat û ajandeyên derve hilbijart.
Meclisa Giştî ya PYD’ê di dawiya daxuyaniya xwe banga demokrasî û guhertinê li Sûriyê bi rêbazên aştiyane kir û ev yek got: “Derketina dewleta Tirk a dagirker ji Sûriyê ji girîngtirîn çareseriyên aloziya Sûriyê ye ku dê aloziyê bi dawî bike.
Heke Rêveberiya Xweser û Hêzên Sûriya Demokratîk (QSD) nebe beşek ji destûra Sûriyê, mafên gelê kurd û kêmneteweyên din tê de neyên nivîsandin, çareserî li Sûriyê pêk nayê.”
