TEV-DEM û PYD’ê û MSD’ê bi boneya salvegera dagirkirina Efrînê daxuyanî dan.
Di daxuyaniyan de, bang li hemû rêxistinên navneteweyî yên mafên mirovan hat kirin ku helwesteke xurt nîşan bidin û dagirkeriya dewleta Tirk bi dawî bikin. Her wiha hat diyar kirin erka wan a sereke rizgarkirina Efrînê û herêmên din ên dagirkirî ye.
Tevgera Civaka Demokratîk (TEV-DEM) ji bo salvegera 4. a dagirkirina Efrînê daxuyaniyek da.
TEV-DEM’ê balkişand ser kirinên dewleta Tirk ên li Efrînê û ev tişt anî ziman:
“4 sal in Efrîn dagirkirî ye.
Rojane çeteyên Tirkiyê li dijî şêniyên Efrînê sûcên derexlaqî pêk tînin.
Tenê ji ber ku Kurd in.
Rewşên zehmet ên jiyanî li ser wan tê ferzkirin û mal û milkên wan û çavkaniyên jiyana wan, tên desteserkirin.”
TEV-DEM’ê civaka navneteweyî weke berpirsê dagirkirina Efrînê nîşan da û got:
”Civaka navneteweyî derfet da dagirkirina Efrînê.
Niha jî çavên xwe ji sûc û hovîtiya dewleta Tirk re digire.
Dawiyê, TEV-DEM’ê bang li raya giştî ya cîhanê kir ku hewlesteke diyar û eşkere li dijî dagirkeriya dewleta Tirk nîşan bide.
PYD: 4 sal in Efrîn li dijî dagirkeran li ber xwe dide
Pariya Yekîtiya Demokratîk – PYD’ê jî bi heman armancê daxuyaniyek da.
PYD’ê diyar kir ku Efrîn di sala xwe ya çaran a dagirkirinê de hîna jî li ber xwe dide û got:
”Ji wê dîroka reş a dagirkirina Efrînê û vir ve, Tirkiyê li dijî gelê me yê Efrînê, şêweyên herî hovane ji kuştin, wêrankirin û çewisandin
ê pêk tîne.”
PYD’ê daxwaz ji hêzên çalak di dosyaya Sûriyê de û bi taybet hêzên navdewletî kir ku dagirkeriya Tirkiyê li herêmê bi dawî bikin.
Her wiha bang li civaka navdewletî jî kir ku binpêkirinên Tirkiyê li Efrînê qebûl neke û Efrîn ji şêniyên wê yên resen re vegerîne.
MSD: Rizgarkirina Efrînê ji karên me yên sereke ye
Her wiha Meclisa Sûriya Demokratîk MSD’ê jî derbarê mijarê de daxuyanî da..
MSD`ê diyar kir ku piştî berxwedana 58 rojan a gelê Efrîn û hêzên wan ên parastinê, bi rêdana hêzên navdewletî Efrîn hat dagirkirin…
MSD’ê got: “Tevî vê yekê, gelê Efrînê û rêveberiya wê ya xweser israra berdewamkirina xeta berxwedanê kir û berdêlên giran dan.
Li hemberî vê yekê civata navneteweyî bê deng ma, piraniya welatan piştgiriya dewleta Tirk kir û gelê Efrînê û Sûriyê xapandin.”
MSD’ê eşkere kir ku doza rizgarkirina vî bajarî ji karên wan ên sereke ye.
MSD’ê bang li NY kir ku li hemberî vegera niştecihên Efrînê li warên xwe û rakirina hemû siyasetên guhartina demografiyê bi erka xwe rabe…
Her wiha bang li hemû hêzên nîştimanî yên demokratîk ên Sûriyê jî kir ku hevgirtina xwe ava biki, da Efrîn û tevahiya herêmên dagirkirî bên rizgarkirin
