Li Bakurê Kurdistanê ji aliyekî pîrozbahî dewam dikin û ji aliyekî jî bangên tevlêbûna Newrozê li gel tê kirin. Siyasetmedarê Kurd Ahmet Turk îşaret bi giringiya Newrozê kir û got: “Xwediderketina li Newrozê, xwedîderketina li xwebûn, nasname û têkoşîna azadiyê ye” Li gelek deverên din jî amadekarî ber bi dawiyê ve diçin.
Li Bakurê Kurdistanê Newroza îsal dê li 72 navendan bi dirûşma “Dem dema serkeftinê ye” bê pîrozkirin.
Têkildarî pîrozbahiyên Newrozê siyasetmedarê Kurd Ehmed Turk ji ajansa Mezopotomyayê re axivî.
Ehmed Turk, di serî de cejna gelê Kurd pîroz kir û da zanîn wate û girîngiya Newrozê ji bo gelê Kurd cudaye.
Ehmed Turk diyar kir ku hemû cîhan girîngiyê bi pîrozbahiyên Newrozê yên kurdan tînin û got:
“Çavê hemû cîhanê li ser kurdan e. Hemû kes dibêje; ‘gelo dê tevlibûn çawa be?
Ehmed Turk destnîşan kir ku xwediderketina roja Newrozê, dê bibe peyama; xwedîderketin li xwebûn, nasname, û têkoşîna xwe û ev bang kir:
“Lewma banga min a ji bo gelê me ew e ku hemû kes biherike qada Newrozê.
Li gorî min ev erk û berpirsyariyeke.”
Li Cizîra Botan welatî ji bo bi cilên netewî beşdarî cejnê bibin cilan çedikin
Li aliyê din amadekariyên ji bo pîrozbahiyên Newrozê li Bakurê Kurdistanê bênavber didomin.
Newroza Cizîr a Botan îsal dê di 21’ê Adarê de li Qada Newrozê bê pîrozkirin.
Di vê çarçoveyê de welatiyên navçe û bajaran jî amadekariyên xwe dikin.
Welatî ji bo bi cilên netewî beşdarî cejnê bibin, diçin terziyan û cilan çêdikin.
Amadekariyên Newroza “dem dema serketinê ye” dewam dikin
Amadekariyên Newroza ku wê îsal bi dirûşmeya “Dem Dema Serkeftinê ye” di 19’ê Adarê de li Şirnexê were pîrozkirin jî dewam dikin.
Parlamenterê HDP’ê Hesen Ozguneş banga tevlibûnê li gelê Botanê kir û got,
“Divê gelê Botanê bi rengên xwe bi coşa xwe biherike qadan.”
Yek ji navendên ku her sal pîrozbahiya Newrozê bi coş û heybet lê derbas dibe jî Batman e.
Pîrozbahiya Newrozê ya li Batmanê dê di 20’ê Adarê de bê lidarxistin.
Komîteya Amedakar a Newroza Batmanê diyar kir ku amadekariyên wan ber bi dawiyê ve diçin û li her cihê ew diçinê bi kelecana Newrozê tên pêşwazîkirin.
Navçeya Qoserê ya Mêrdînê jî amadekariyên xwe xilas kirine û ji pîrozbahiya Newrozê re amade ye
Endamên Komîteya Amadekar a Newroza Qoserê diyar kir ku amadekariyên wan temam bûne û ji bo pîrozbahiya sibê banga beşdariyê li xelkê navçeyê kirin.
Di çarçoveya amadekariyên Newrozê de Komîteyên amadekar ên bajar û navçeyên Amed, Riha, Sert, Şirnex, Mêrdînê jî belavok li gel belavkirin û banga beşdariya Newrozê kirin.
Li bajarên Tirkiyê Edene, Mersîn, Kocaelî, Stenbol, Bûrsa, Çanakkale û Tekîrdagê jî amadekariyên Newrozê hatin kirin û gel ji bo pîrozbahiyan hatin vexwendin.
