Li nava Îsraîlê metirsî serwere. Di nava 10 rojan de êrişa sêyemîn li welat pêk hat. Doh careke din li bajarê Benî Barak êrişeke çekdarî pêk hat, polîsek di nav de 5 kes hatin kuştin. Artêşa Îsraîlê ji bo pêşîgirtina êrişan hêza leşkerî ya li xeta Şerîaya Rojava zêde kir. Artêşê 4 taburên nû çandin herêmê. Serokwezîrê Îsraîlê Benett jî got: Em bi pêleke nû ya terorîzmê re rûbirû ne.
Li Îsraîlê metirsî belav bûye.
Di daxuyaniya polêsên Îsraîlê de hat ragihandin ku doh êvarî li bajarê Benî Barak ê rojhilatê Tel Avîvê di êrîşa çekdarî de, yek ji wan polîs 5 kes hatin kuştin.
Hat destnîşankirin ku “terorîstê ku li kuçeyê bi çeka otomatîk gule li sivîlan reşandin” ji aliyê hêzên ewlehiyê ve hat kuştin.
Çapemeniya Îsraîlî ya ku ji çavkaniyên ewlehiyê agahî da, diyar kir ku êrîşkar niştecihê bajarokê Yabed ê bajarê Cenîn ê li Şerîeya Rojava ye.
Serfermandarê Îsraîlê Aviv Kohavî ferman da ku hêzên teqwiye ji bo herêma nêzî Xeta Kesk, Quds û taxên wê, wargehên mezin ên Cihûyan û Şerîeya Rojava bên şandin.
Li gorî daxuyaniya artêşa Îsraîlê, ev biryar piştî nirxandina xwe ya bi artêşê re hatiye dayîn.
Hat destnîşankirin ku jimara hêzên ji bo ketina Filistîniyan ber bi Îsraîlê ve asteng bike, 4 tabûr e.
Bennet: Em bi pêleke nû ya êrişa terorê re rûbirû ne
Serokwezîrê Îsraîlê Naftali Bennett piştî êrîşa ku li Benî Barak, li rojhilatê paytext Tel Avîvê, di peyameke vîdyoyî de xîtabî Îsraîliyan kir.
Naftali Bennett got, “Welatiyên Îsraîlê, em di rojên dijwar re derbas dibin. Niha em bi pêleke nû ya terorê re rû bi rû ne.”
Bennett êrişên navbera 10-21’ê Gulana 2021’an, li ser Şerîda Gazzeyê bibîrxist û ev tişt anî ziman: “Ev nîşaneya despêkê a terorîzm û tundiyê (êrîşên heyî) bû ku me şahidiya wê kir.”
Ji aliyê din ve li gorî nûçeyên ku di medyaya Filistînê de cih girtin, komek mezin ji leşkerên Îsraîlê derbasî bajarokê Yabed a li başûrê rojavayê Cenînê bûn.
Leşkeran bi ser gelek malan de girtin.
22’ê Adarê li bajarê Birusseba li başûrê welêt 4 Îsraîlî bi kêrê hatibûn kuştin.
Hat diyarkirin ku êrîşkar alîgirê DAIŞ’ê bû û berê ji ber sûcên “ewlehiyê” ketibû girtîgehê.
27’ê Adarê li bajarê Hadera, di encama gulebarana du êrîşkaran de 2 polîs hatin kuştin û 3 polîs jî birîndar bûn.
Çeteyên DAIŞ’ê ev êriş jî li xwe girtibûn.
Bi êrişa dawî re, di nava hefteyekê de, ev bû êrişa sêyemîn ya li Îsraîlê pêk hatî.
