Bi nêzîkbûna salvegera tawanê Enfalê, beşek ji xizmên qurbaniyên Enfalê, diyar kirin ku heta niha hikûmeta Başûrê Kurdistanê nekariye kar li ser dosya enfalê bike û weke jenosîd bide naskirin.
Xizmên qurbaniyan dixwazin cenazeyên wan bên radestkirin û berpirsyar bên dadgehkirin.
Li Başûrê Kurdistanê Enfal di 23’yê Sibata 1988’an de bi pêşengiya Elî Hesen Mecîd ku pismamê SedAm Hisên bû de dest pê kir û 6 mehan dewam kir.
Di van êrîşên dijwar de gelek navçe hatin wêrankirin û talankirin.
Enfal di 8 qonaxan de pêk hat û di nava van 8 qonaxan de bi giştî 182 hezar kes hatin qetilkirin.
Li Başûrê Kurdistanê bi fermî roja 14’ê Nîsanê weke roja Enfalê hatiye destnîşankirin.
Tevî ku di ser Enfalê re 34 sal derbas bûn, hîn cenazeyên kesên jiyana xwe ji dest dane, ji çolistanên Iraqê nehatine anîn û cenazeyên anîne jî bêyî ku testa DNA’yê bigirin, hatine veşartin.
Ji derveyî vê jî kesên ku destê wan di sûcê Enfalê de hene, PDK wan diparêze û pile û wezîfe pêşkêşî wan kirine.
Kurê yek ji kesên li navçeya Çemçemal a Silêmaniyê di Enfalê de jiyana xwe ji dest dayî, Seyfedîn Keyfî ji Rojnews’ê re axivî.
Seyfedîn Keyfî diyar kir, ew dixwazin hikûmeta Başûr cenazeyan ji Bexda bîne û gorên komî werin vekirin.
Derbarê mijarê de Seyfedîn îşaret bi nêzikatiya hikumeta Başûrê Kurdistanê kir û got:
Nexasim li gel hikûmeta Herêma Kurdistanê tenê berjewendiyên wê girîng e.
Ji bo wan cenazeyê kesên enfalkirî li kûderê be ne girînge. ”
Seyfedîn Keyfî bal kişande ser nedadgehkirina kesên ku destê wan di sûcê Enfalê de hebûn û wiha got:
“Berjiwendiyên hikumet û hizb li gel van kesan heye.
Lewma ji bo wan jiyanek xweş afirandiye û ceza nakin”
Kurê qurbaniyekî din yê Enfalê Awat Ehmed jî têkildarî mijarê axivî û anî ziman heta niha ti niyeteke hikûmeta Başûr û Iraqê ji bo anîna cenazeyan nîne.
Awat Ehmed got:
“Eger armanca wan a anîna cenazeyan hebûya, wê nîmuneyên xwînê ji me bigirtana.”
Her wiha xizmê qurbaniyê Enfalê Ehmed bi bîr xist heta niha enfal ji aliyê hikûmetê ve weke jenosîd jî nehatiye naskirin.
Awat Ehmed herî dawî got:
“Ji berî niha hejmarek cenaze li Tiba Edlî ya Bexdayê ji ber temasa ceyranê tine bûn, dibe ku ev senaryoyek ji bo tinekirina cenazeyan be.
