Serketina Macron li Brukselê bi keyfxweşî hat pêşwazîkirin
Lîderên Ewropa ji bo serketina Emmanuel Macron pîroz bikin ketin rêzê.
Dengdêrekî Fransî beriya hilbijartina doh dibêje “Ez ê dengê xwe bidim Macron, lê tenê ji bo ku Le Pen nebe serokomar.”
Dengdana ji bo pêşîgirtina li desthilatdariya rastgirên tund li Fransayê ne diyardeyeke nû ye.
Lê dabeşkirina kesên ku dengê xwe dane wî tiştek e ku divê serokê Fransa Emmanuel Macron li ser bifikire.
Ji xeynî kesên ku ne ji bo wî lê ji bo astengkirina serokatiya hevrika wî Marine Le Pen deng dane, bi mîlyonan jî hene ku di protestoyê de dengên vala an betal dane.
Lê tevî vê Le Pen kariye ji sedî 42 dengan bigre.
Slogana Macron Pour Tous (Ji bo herkesî) hindirê wê vale xuya dike.
Macron di axaftina xwe ya serketinê de li ber ala Fransayê ya li ber Birca Eiffelê got,
Ez dijberiya di nava welate de pêk hatî dibînim.
Ji bo bi dawî kirina vê yekê çi ji destê min were ezê bikim.
Ew ê ne hêsan be. Û haya wî bi xwe jî jê heye.
Fransa ne tenê diwarê bijardeyên partiyan ve, lê di heman demê de li navendên bajaran ên dewlemend (bi taybetî Parîs) û gundên jibîrbûyî, neteweperest û enternasyonalîst, dewlemend û xizan jî hatiye dabeş kirin.
5 sal berê dema hat ser desthilatdariyê, soz da ku ne li milê rast û ne jî çep be, soza dadmendiya civakî û başbûna aborî da.
Despêkê pandemiya Covid-19 û piştre jî êrişa Rûsya li dijî Ûkrayna bandor li aboriyê kir.
Ji aliyê din ve, rastgir û rastgirên tund jî bi dewamî zext li ser mijarên wekî ewlehî û koçberiyê kirine.
Sozên edaleta civakî û reforma jîngehê jî di vê pêvajoyê de li paş man.
Dema ku Macron li Fransayê kesayetek polarîzeker e, li Brukselê jê tê hezkirin.
Bi kêmanî beramberî hevrikê xwe Le Pen.
Serokên Yekîtiya Ewropayê piştî serkeftina Macron ketin rêzê û li pey hev ew pîroz kirin.
Ji Serokê Komîsyona Yekîtiya Ewropayê heta lîderên Îspanya û Almanyayê gelek siyasetmedaran Macron pîroz kirin û gotin ev yek jî tê wateya dengê pêbaweriyê ji bo Ewropayê.
Macron bi qasî ku Le Pen li dijî YE yê girtî ye, parêzvanê YE yê ye.Piştî serketina Macron, alîgirên Le Pen li gelek bajaran daketin kolanan û bi polîsan re ketin nava pevçûnan.
