Rêveberiya Xweser a Şengalê derbarê êrişên artêşa Iraqê yên li ser Şengalê, daxuyaniyek nivîskî da. Di daxuyaniyê de hat diyarkirin ku hikumeta Kazimî ji bo peyamana 9’ê Cotmehê bixe meriyetê, artêşa Iraqê bi ser Şengalê de dişîne û PDK jî pişta xwe dide vê peymanê û bi xeyala vegera Şengalê, êrîş dike. Rêveberiyê got, çavkaniya hemû pirsgirêkan peymana 9’ê Cotmehê ye û xwest ev peyman bê betalkirin.
Rêveberiya Xweser a Şengalê derbarê êrişên dawî yên artêşa Iraqê yên li ser Şengalê, daxuyaniyek nivîskî belav kir.
Di destpêka daxuyaniyê de bal hat kişandin ser êrîşên ku artêşa Iraqê ji 18’ê Nîsanê ve li dijî Şengalê pêk tîne û wiha hat gotin.
“Dixwazin car din dîroka fermanan li me nû bikin.
Di dema fermana 2014’an de Artêşa Iraqê pişta xwe da Şengalê û çû, PDK bi îxaneteke mezin hevkariya fermanê kir û dewleta Tirk a dagirker bi destê çeteyên DAIŞ’ê xwest me tune bike.
Wekî civaka Êzidî, bi piştgiriya gerîlayên azadiyê û Şoreşa Rojava me xwe ji vê fermanê rizgar kir û ji bo ferman car din neyê serê me, me dest bi avakirina pergala Rêveberiya Xweser kir.
Di nav van 8 salan de ji bo statuya Şengalê were zelalkirin me gelek proje pêşxistin û gelek hevdîtin kirin.
Lê hewldanên me yên çareseriyê di 9’ê Cotmeha 2020’an de bi planeke nû ya qirêj re hate bersivandin.
Li Şengalê çavkaniya hemû pirsgirêk, alozî, şer û pevçûnan Peymana 9’ê Cotmehê ye. ”
Rêveberiya Xweser a Şengalê: Çavkaniya hemû pirsgirêkan peymana 9’ê Cotmehê ye
Di dewama daxuyaniyê de bal hat kişandin ser hevkariya PDK’ê ya li dijî Şengalê û wiha hat domandin:
“PDK pişta xwe dide vê peymanê û bi xeyala vegera Şengalê êrîşê me dike.
Hikumeta Kazimî ji bo peymanê bixe meriyetê niha artêşa Iraqê bi ser Şengalê de dişîne.”
Di daxuyaniyê de hat gotin ku yek ji xalên peymanê tinekirina Asayîşa Êzîdxanê ye û ji bo wê jî artêşa Iraqê dixwaze ku ew dest Asayîşa Êzîdxanê berdin.
Her wiha di daxuyaniyê de hat raghandin ku Rêveberiya xweser a Şengalê ji bo ku dawî li şer û aloziyê were , hevîdîtin li gel Bexdayê pêk anîn, lê belê di hevdîtinan de rêz li hemberî îradeya civaka êzîdî û hêza wê, nehatiye girtin.
Rêveberiya Xweser a Şengalê:divê rêz ji Rêveberiya Xweser a Şengalê û hêza wê re, were girtin
Di dawiya daxuyaniyê de bang li hêzên Iraqê hat kirin ku neyên lîstoka dewleta Tirk û PDK’ê.
Her wiha banga rêzgirtina li hember Rêveberiya Xweser a Şengalê û hêzên wê yên parastinê hat kirin û bang li civaka êzîdî hat kirin ku bi yekîtiya xwe, bersiva hemû êrîşên qirkirinê bidin.
