Li rawestgehên jiyanê li kêliyên herî germ, bi dilek têr eşqa jiyanê têkoşînê hembêz kir.
Em behsa şoreşger Şêrîn Elemhulî dikin. Şêrîn di her kêlî û demsalên xwe-gihandina azadiyê de ne keleman nas kir, ne jî sêdarê dikaribû ew eşqa jiyana azad a di dilê wê de geş bûye bitefîne.
Di pêvajoyeke ku li ser tevahiya Kurdistanê polîtîka û hişmendiya qirkirin û tunekirinê dihat pêkanîn de dil û rihek ber bi têkoşîna azadiyê ve dest bi meşa dirêj a azadiyê kir.
Ew jina çeleng a hebûna xwe bi nasnameya jina azad biwatedar kiriye Şêrîn Elemhulî ye.
Jina Şoreşger ji Rojhilatê Kurdistanê ye û di sala 1981’ê de li gundê Dêm-qişlaq ê Makoyê tê dinê.
Şîrîn bi her fêrbûnê re pergal û hişmendiya ku li ser gelê Kurd tê meşandin jî nas dike û nakokiyên wê li hemberî vê pergalê çêdibin.
Di 2006’an de li Rojhilatê Kurdistanê gelê Kurd li dijî nêzîkatiyên dewleta Tirk ên li hemberî gelê Kurd û Rêber Abdullah Ocalan rabûn serhildanê.
Jinên ji Rojhilatê Kurdistanê pêşengiya vê serhildanê kirin.
Şêrîn Elemhulî tam di vê pêvajoyê de biryara jiyana nû dide û yekemîn gavên xwe yên di têkoşîna azadiyê de davêje.
2008’an di encama êrişên hevpar ên dewleta Tirk û rejîma Îranê de hevalên herî nêz ên Şêrîn bi berxwedaniyek bêhempa jiyana xwe ji dest didin.
Şêrîn soz dide ku li hemberî van hemû zilma rejîma Îranê tola hemû hevrê û gelê xwe rake.
Lewma biryar dide ku di nava balafirgeha paytexta Îranê Tahranê de çalakiyek fedayî bike.
Dema nêzî balafirgehê dibe, tê binçavkirin.
Di bin çavan de bênavber ji aliyê hêzên Îranê ve bi tundî tê îşkencekirin.
Şêrîn Elemhulî di bîranînên xwe de dibêje:
”Ew kesên ku êşkence li min dikirin, zilam bûn û ez bi textekê ve girêdabûn. Bi darê ceyranê, kulm û zeleyan îşkence li min dikirin. Ji ber ku min farisî jî baş nedizanî zêdetir zext li min dikirin. Dibe ku hûn bedena min dîl bigrin lê bi tu awayê hûn nikarin şerefa min dîl bigrin.”
Der barê Şêrîn ya bi salan li girtîgeha Ewînê tê girtin de biryara darvekirinê tê dayîn.
Şêrîn û çar hevreyên wê bi sirûda ‘Ey Reqîp’ biryara rejîma faşîst a Îranê pêşwazî dikin û bi vê sirûdê diçin ber sêdarê.
9’ê Gulana 2010’an de tevî 4 hevalên xwe, Şêrîn tê darvekirin.
Şêrîn Elemhulî piştî Leyla Qasim bû duyemîn jina Kurd a bi destê feraseta dewleta mêr-serwer tê darvekirin.
