Şer, alozî, krîza aborî û avhewa pêla koçberiyê ya li seranserê cîhanê zêde kiriye.
NY ragihand ku bi şerê Ukrayna û Rûsya re, ev pêla koçberiyê ji her demê zêdetir bûye.
NY got,Cara yekeme jimara koçberan 100 milyon derbas dike.
Li seranserê cîhanê, krîza avhewa, aborî û siyasî jimara kesên ji cih û warê wan koçber kirî zêde kir.
Şerê li Ukrayna ev rewş hîna aloztir kir.
Komîseriya Bilind a Penaberan a Neteweyên Yekbûyî (UNHCR) îro li ser mijarê daxuyaniyek da.
Komîseriyê di daxuyaniya xwe de wiha got:
“Di dîrokê de yekem care ji ber şer, tundî, binpêkirinên mafên mirovan û çewsandinê jimara kesên ku neçar man ji cih û warê xwe bibin, 100 mîlyonî derbas kir.”
Ev jimar, ji sedî 1’ê nifûsa giştî ya cîhanê dike.
Komîserê Bilind ê Penaberan ê NY Filippo Grandi bi gotina “Ev rekorek bû ku divê tu carî neyê şikandin” rewşa heyî nirxand û wiha got:
“Divê ev bibe banga hişyariyê ji bo çareserkirin û pêşîgirtina pevçûnên wêranker, bidawîkirina çewisandinê û şerkirina sedemên ku mirovên bêguneh neçar dikin ku birevin.”
Li gorî daneyên NY, heta dawiya sala 2021’an li tevahiya cîhanê jimara kesên ji cih û warên xwe bûne 90 mîlyon zêde bûye.
Sedema vê yekê jî şerê li Etiyopya, Bûrkîna Faso, Myanmar, Nîjerya, Efxanistan û Komara Demokratîk a Kongoyê hat nîşandan.
Di daxuyaniyê de hat diyarkirin ku bi bandora şerê li Ukraynayê re ev hejmar bi lez zêde bûye.
Grandî bal kişande ser wê yekê ku îsal 8 milyon kes neçar mane ku ji nav welêt û zêdetirî 6 mîlyon kes jî ji derveyî sînorên welêt koçber bibin û got:
“Berteka navneteweyî ya li hember rewşa wan kesên ku ji ber şerê li Ukraynayê reviyane, gelekî erênî ye.”
Komîseriya Bilind diyar kir ku bertekên hestiyar ên civaka navneteweyî zindî ne û daxuyakirin ku ji bo hemû krîzên cîhanê nêzîkatiyeke bi heman rengî pêwîst e.
Grandî bal kişand ser wê yekê ku divê mirov tenê bi alîkariyên mirovî têr nebe.
Ji 100 mîlyon mirovên jicîhûwarkirî li çaraliyê cîhanê, nêzîkê 53.2 mîlyon neçar bûn ku di nav welatê xwe de koçber bibin.
Komîseriya Bilind a Penaberan a NY wê di 16’ê Hezîranê de rapora xwe ya salane ya Trendên Gerdûnî ya li ser penaber û koçberan eşkere bike.
