“Şoreşa Rojava ji mirovahiyê re bûye çavkaniya hêviyê”

Komîteya Rêveber a PKK’ê salvegera Şoreşa Rojava bi peyamekê pîroz kir.
PKK’ê diyar kir Şoreşa Rojava ji mirovahiyê re bûye çavkaniya hêviyê û û got,
“Em di wê baweriyê de ne ku wê şoreş mezintir bibe û hîn bi pêş ve biçe.” 

Komîteya Rêveber a PKK’ê bi wesîleya salvegera 10. a Şoreşa Rojava daxuyaniyek weşand.

PKK’ê salvegera Şoreşa Rojava li gelên Bakur û Rojhilatê Sûriyê pîroz kir û bi hezaran şehîdên şoreşê bi rêzdarî bibîranîn.

PKK’ê diyar kir şoreşa Rojava wê di deh salên pêş de hîn xurt û berfirehtir bibe û wiha got,

“Di serî de Kurd; gelên Bakur û Rojhilatê Sûriyê ji hev bawer kirin, mil dan hev, bi vî rengî zor û zehmetî hemû ji holê rakirin û şoreş gihandin vê astê.

Êdî dema amatorî ya Şoreşa Azadiyê qediya ye û pêvajoya profesyonelî û hostatiyê destpê kiriye.

Eşkere ye ku Şoreşa Azadiyê ya Rojava qada destpêkê ye ku Bîrdoziya Modernîteya Demokratîk a Rêber Abdullah Ocalan di vê çarçoveyê û kûrahiyê de hatiye bicihanîn.”

PKK: Rêber Apo di encama xebatên 20 salan de bingeha şoreşê danî

PKK’ê bibîrxist ku şoreş li ser bingeha karên perwerde û rêxistinkirinê yên Rêber Apo de hate amadekirin ku Rêber Apo 20 salan bi xwe meşand û wiha dewam kir;

“Bingeha şoreşê bi vî rengî hate danîn û bi ser xistin.

Di vê çarçoveyê de hin kêmasî û şaşitî rû dabin jî bi esasî ji bo bicihanîna paradîgmaya civaka demokratîk, ekolojîk û azadîparêziya jinê, israr kiriye.

Bi wergirtina dersên dewlemend ji deh salên derbasbûyî wê di dema pêş de paradîgmaya Apoyî hîn bi rast û bandor bi cih bê anîn.

Şoreşa Azadiyê ya Rojava di pêvajoya deh salên derbasbûyî de ji aliyê pêkanîna xeta neteweya demokratîk ve bi ser ket.”

PKK: Şoreşa azadiyê ya Rojava di heman demê de şoreşa azadiya jinê ye

PKK’ê di daxuyaniya xwe de bal kişande li ser rol û pêşengiya jinan ya di şoreşa Rojava de û ev tişt got;

“Eşkere ye ku Şoreşa Azadiyê ya Rojava di heman demê de Şoreşa Azadiyê ya Jinê ye.

Jinên ku berê ji bilî nava mal û malbatê nekarîbûn tevlî nava jiyanê bibin, li ser bingeha perwerde û karekî mezin ê rêxistinî bi rengekî wekhev û bi asta pêşengiyê beşdarî her qada jiyana siyasî û civakî bûn.”

PKK’ê diyar kir Gelên Bakur û Rojhilatê Sûriyê û hêzên azadiyê YPG-YPJ’ê di nava neh salan de ji bo parastina welêt û şoreşê zêdeyî deh hezar şehîd dan, bi lehengî li ber xwe dan û wiha got,

“Ji bo parastin û pêşvebirina Şoreşa Azadiyê ku hêviya mirovahiyê ye, berxwedana ku hate nîşandan ji Bakur û Rojhilatê Sûriyê jî derbas bû, li nava cîhanê belav bû û veguherî Berxwedana Mirovahiyê ya Azad.

Vê yekê karakterê enternasyonalîst ê Şoreşa Azadiye ya Rojava xurtir kir, bêhtir bi pêş ve bir.”

PKK: Ji bo parastina şoreşê pêwîstî bi xebatên mezin heye

PKK’ê bal kişande li ser gef û êrişên li ser Rojava û wiha dawî kir;

“Bêguman wezîfe neqediya ye û şoreş bi dawî nebûye. Her tiştî hê nû destpê kiriye.

Di serî de dewleta Tirk êrîş û gefên dagirkeriyê yên hêzên cuda dewam dikin. Ev hemû piralî ne û li dijî vê jî pêwîstî bi amadekariyên ji her alî ve heye.

Gelê me û mirovahî wê bi Şoreşa Rojava re bin û her tim bi her awayî piştgiriyê bidin.”

Back to top button