YE piştî ragihandina seferberiya qismî ya Putin xwe amade dike ku cezayên nû li dijî Rûsyayê ragihîne.
Tirkiyê jî referandumên ku li rojhilatê Ukraynayê hatibûn plankirin wek “neqanûnî” bi nav kir.
Serokomarê Ukrayna Zelensky jî banga cezakirina Rûsya kir.
Serokê Rûsyayê Vladimir Putin doh li welatê xwe seferberiya qismî ragihand.
Piştî vê Wezîrên Karê Derve yên Yekîtiya Ewropayê (YE) di civîneke nefermî de li hev civiyan û li ser tedbîrên nû yên ku li dijî Moskovayê bên avêtin, gotûbêj kirin.
Nûnerê Bilind ê Têkiliyên Derve û Polîtîkayên Ewlehiyê yê YE Josep Borrell der barê hevdîtinê de agahî da û got;
Tedbîrên nû yên sînordar ên ku hatine plankirin wê di demek nêz de li civîneke fermî ku bê lidarxistin de biryar were girtin.
Borrell bal kişand ser wê yekê ku armanca wan ew e endamên YEyê bi awayekî koordînekirî li dijî Rûsyayê tevbigerin û got;
Cezayên nû dibe ku li ser kes û hin şaxên wan bin.
Borrell bi domdarî ev tişt anî ziman:
“Rûsya bi ragihandina seferberiya qismî, lidarxistina referandûmeke neqanûnî û gefa bikaranîna çekên nukleerî, rêya rûbirûbûnê hilbijart.”
Wezîrên Karê Derve yên YE wê di nîvê Cotmehê de civîna xwe ya fermî li dar bixin û li ser cezayên nû gotûbêj bikin.
Lê ne diyar e ku li welatên Ewropayê yên ku krîzeke giran a enerjiyê dijîn wê di vê mijarê de lihevkirinek çêbibe yan na.
Macarîstan li benda pakêta nû ya cezayên li dijî Rûsyayê ne.
Tirkiye: Planên referandumê “nerawa” ye
Li hember referanduma ku Rûsya dixwest li bajarên Luhansk, Donetsk, Xerson û Zaporijiya yên rojhilatê Ukraynayê pêk bîne, ji aliyê Tirkiyê ve jî bertek hat nîşandan.
Wezareta Karê Derve referanduma ku tê plankirin wek “neqanûnî” pênase kir û got,
“Tiştên wiha ne rewa wê ji aliyê civaka navneteweyî ve neyê naskirin.”
Zelensky ji lîderên cîhanê re axivî
Serokomarê Ukraynayê Vlodymyr Zelensky jî di peyama xwe ya vîdyoyî de ku ji Civata Giştî ya NY re şand, bang li cîhanê kir ku Moskow ceza bike.
Vlodymyr Zelensky got,
“Rûsya ji ber kuştin, êşkence, heqaret û aloziyên giran ên ku li Ukraynayê pêk aniye divê were cezakirin” û xwest ku dadgeheke taybet ji bo darizandina Rûsyayê bê avakirin.
Zelensky anî ziman ku pêwiste Rûsya berdêla wêraniya şerê heyî bide.
Putin ragihand ku duh li Rûsyayê seferberiya qismî hatiye îlankirin û piştre Wezîrê Parastinê Sergey Şoygu ragihand ku bang li 300 hezar leşkerên yedek hatiye kirin.
