Li nava Rûsya li dijî seferberiya serokê welat Putin ragihandî, xwepêşandan hatin lidarxistin. Polîsan êrişî xwepêşandêran kirin û bêtirî 1300 kes binçav kirin.
Her li nava welat reva ji seferberiyê jî despê kiriye.
Piştî ku Serokê Rûsyayê Vladimir Putin duh seferberiya qismî îlan kir, li seranserê welêt xwepêşandan pêk hatin.
Li gorî agahiyên ku rêxistina serbixwe ya mafên mirovan OVD-Info parve kir, di çalakiyan de bêtirî 1300 kes hatin binçavkirin.
Seferberiya ku piştî Şerê Cîhanê yê Duyemîn cara yekem hatî ragihandin, aloziya li nava welat zêde kir.
Gelek kes ji bo ku ji welêt birevin dest bi kirîna bilêtên balafiran kirin.
Piştî axaftina Putin a duh Wezîrê Parastinê Sergey Şoygu li gorî biryarnameya ku îmze kiribû gazî 300 hezar leşkerên yedek kir.
Şoygu diyar kir ku kesên xwedî ezmûnên leşkerî tên wezîfedarkirin û diyar kir ku xwendekar û yên niha li ser erka leşkerî ne di çarçoveya seferberiyê de ne.
Lêbelê, fikar hene ku di her kêliyê de qada seferberiyê ya li welêt were berfireh kirin.
“Ji ber çi wê zarokên me bimirin?”
Li gorî çapemeniya Amerîka di nava 15 deqeyên despêka xwepêşandanan de bi dehan kes hatin binçavkirin.
Jineke ku naxwaze zarokên we tevlî seferberiyê bibe jî got;
“Ez ji tiştekî natirsim.
Tişta herî bi qîmet ku dikarin ji me bistînin jiyana zarokên me ye.
Ez ê jiyana zarokê xwe nedim wan.”
Serdozgeriya Rûsya jî bi baya bezê biryare derxist ku kesên xwepêşandan rêxistin dikin heta 15 salan cezayê girtîgehê wê lê were birîn.
Siyasetmedaran jî bertek nîşanî seferberiyê dan
Muxalîfê Rûs Dmîtrîy Gudkov yê di meha Hezîranê de ji ber metirsiya girtinê neçar ma ji welêt bireve, li ser mijarê ji çapemeniya Alman re axivî.
Gudkov got:
Jê re “seferberiya qismî” tê gotin, lê ev tenê bi gotinan e.
Min hemû fermanên Putin bi baldarî xwend.
Her kesî seferber dikin.”
Gudkov seferberî weke “kampanyaya cenaze ya dawî ye ku Pûtîn ragihandî” binav kir.
