Serokomarê Ukrayna Zelenksy jî ragihand ku li herêma navborî her tişt wêran bûye.
Şerekî ku dawiya wî ji nêz ve xuya nake.
Alozî û wêranbûnek zêde li herêmê tê xuyakirin.
Ev rewşa dawî ya şerê li Ukraynayê ye.
Serokê Ukraynayê Volodymyr Zelensky got, rewşa bajarokê Soledar yê şereke dijwar lê rûdide, pir aloz e.
Ev bajarokê herêma Donetsk berê ji aliyê hêzên Ukraynî ve hatibû kontrolkirin.
Lê di nava demên dawiyê de, hêzên Rûsya jî careke din di kontrolkirina bajar de bi domdarî êrişan pêk tîne.
Zelensky di peyama xwe ya vîdyoyê ya ku bi şev parve kir de got,
“Rûsya dixwest li wir çi bi dest bixe?
Her tişt bi temamî wêran bû, hema bêje ti jiyan neman û bi hezaran mirov winda bûn.
Li aliyê Soledar, hemû erd bi cesedên dagirkeran û şopên mûşekan hatiye pêçandin.
Bi vî rengî dînbûn xuya dike.”
Di heman demê de, Serokê Ukraynayê got,
“Her çend niha dagirkeran hewldanên xwe yên herî mezin li ser Soledar kirine, lê encama vî şerê dijwar û dirêj, wê azadkirina tevahiya Donbasê be.”
Zelensky da zanîn ku berxwedana leşkerên Ukraynayê ya li Solidar ji bo tevahiya artêşê dem nirxand û got,
“Şerê Donbasê dewam dike.”
Beriya niha jî berpirsekî Ukraynayê ragihandibû ku hêzên Moskowê bi êrîşên dewam û bihêz giranî dane ser bajarê sereke yê Soledar.
Maliar: Çekdarên koma wagner li herêmê ne
Alîkara Wezîrê Parastinê Hanna Maliar bi rêya Telegramê got:
“Piştî hewldana têkçûyî ya dijmin ji bo girtina bajarokê Soledar li herêma Donetsk, wan taktîkên xwe guherand û dest bi êrîşek tund a nû kir.”
Maliar diyar kir ku di êrişan de, çekdarên ji Koma Wagner a Rûsî jî hene.
Zelensky beriya niha gotibû rewşa li Soledar û Bahmutê zehmet e, lê artêşa wî hîna herdu bajaran kontrol dike.
Ji bo Rûsyayê girtina van herêman ji bo kontrolkirina tevahiya herêma Donbasê ku di şer de yek ji armancên Kremlînê ye, wê bibe gaveke girîng.
Rûsyayê herî dawî hişyarî da ku planên rojavayî yên ji bo dayîna çekên giran ên zêdetir ji Ukraynayê wê temenê şer dirêj bike.
Amerîka: Piştevaniya bo Ukrayna wê bidome
Şêwirmendê Ewlekariya Netewî ya Amerîkayê Jake Sullivan di axaftina xwe ya di dema serdana Serokê Amerîkayê Joe Biden bo Meksîkayê de diyar kir ku tevî guhertina piraniyê di Kongreyê de, alîkariya aborî ya Amerîkayê ji bo Ukraynayê di sala 2023’an de wê gelekî xurt be.
