Li Kîevê amadekariyên lûtkeyeke berfireh ya YE-Ukrayna tê kirin. Ji bo vê yekê şandeya YE ya ji 16 kesan pêk tê li Kîevê ye.
Seroka Komisyona YE Von der Leyen diyar kir ku armanca wan ya serdanê nîşandana piştevaniya domdar ya bo Ukraynayê ye.
Sibe 03’ê Sibatê wê li paytexta Ukrayna Kîevê lûtkeya Yekîtiya Ewropa-Ukrayna pêk were.
Şandeya YE ya ji 16 kesan pêk tê ji bo lûtkeyê li Kîevê ye.
Seroka Komîsyona Yekîtiya Ewropayê Ursula von der Leyen têkildarî serdanê li ser hesabê xwe yê Twîtterê daxuyaniyek da û got,
“Em bi hev re li vir in ku bi xurtî nîşan bidin YE weke her tim li cem Ukraynayê ye.”
Von der Leyen diyar kir ku YE piştgiriyê dide Ukraynayê û dixwaze hevkariya welêt kûrtir bike.
Nûnerê Bilind ê Têkiliyên Derve û Polîtîkayên Ewlekariyê yê YE Josep Borrell jî li Kîevê peyamek da û got:
Em ê piştgiriya Ukraynayê ji bo serketina şer û avakirina welêt bidomînin.
Borell ragihand ku ji destpêka şer ve alîkariya Yekîtiya Ewropayê ya ji bo Ukraynayê gihiştiye 50 milyar euro.
Di lûtkeyê de wê çi mijar bên gotûbêjkirin?
Di Lûtkeya YE-Ukraynayê de, tê çaverêkirin ku perspektîfa endamtiya YEyê ya welêt û her wiha piştgiriya bo welat bê nîqaşkirin.
Her wiha tevî rakirina bendên bazirganiyê; tê payîn di lûtkeyê de mijarên wekî alîkariyên mirovî û leşkerî jî bên rojevê.
Serokê Konseya YE Charles Michel jî yek ji lîderên din yê yekîtiyê ye ku li Kîevê ye.
Nayê payîn ku serokên dewlet û hikûmetên welatên endamên yekîtiyê beşdarî lûtkeyê bibin.
Endamtiya Ukrayna bo YE dibe?
Ukrayna di 23ê Hezîrana 2022an de, çar meh piştî destpêkirina şer, statuya “namzedê YE” wergirt.
Lêbelê, tê çaverêkirin ku welat di demek kurt de nebe endamê yekîtiyê.
YE ku statuya namzetiyê da Ukraynayê, destpêkirina muzakereyên ji bo endametiya muhtemel bi heft şertan ve girêda.
Di nava van şert û mercan de têkoşîna li dijî gendeliyê, reforma hilbijartina endamên dadgeha destûra bingehîn heye.
Di daxuyaniya Komîsyona YEyê de hat diyarkirin ku Ukrayna pêşketinek bi dest xistiye, lê ji bo destpêkirina muzakereyan herî zû di nîvê duyemîn a sala 2023an de pêşniyareke fermî tê dayîn.
Berpirsekî payebilind yê Komisyonê got, “Me dît ku dînamîkek reformê heye, lê hîn gelek kar heye ku were kirin.”
