Wezîrê Parastinê yê Ukrayna ragihand ku Rûsya wê di salvegera êrişa li ser welat de, dest bi êrişeke mezin bike.
Serokomarê Ukrayna Zelensky jî got:
Tekane rêya rawestandina Rûsya, têkbirina wê ye.
Li Ukrayna hêviya bidawîbûna şer xuya nake.
Peyam û rewşa li ser erdê nîşaneyên ku ev şer wê hîn zêdetir dirêj bike radixe ber çavan.
Rêveberiya Ukrayna jî vê yekê pêşbînî dike.
Wezîrê Parastinê yê Ukraynayê Oleksî Reznîkov got, Rûsya amadekariya êrîşeke nû û mezin dike û hişyarî da ku dibe ev yek 24’ê Sibatê dest pê bike.
Oleksî Reznîkov diyar kir Moskow ji bo pîrozkirina salvegera êrişa xwe ya li ser Ukrayna bi hezaran leşkeran berhev dike û dibe ku “tiştekî biceribîne”.
Êrişek gengaz wê Roja Parêzvanên Welat, di 23’ê Sibatê de, dema ku serketinên artêşê li Rûsyayê têne pîroz kirin pêk bê.
Di heman demê de, roketeke Rûsî li apartmaneke Kramatorsk a Ukraynayê ket û herî kêm 3 kes mirin.
Tîmên rizgarkirinê di bin xirbeyan de li kesên rizgarbûyî digerin.
Walîtiyê ragihand ku di êrîşa li bajarê herêma Donetskê de 7 kes birîndar bûne.
Ji ber xebatên li bin kavilan, fikar hene ku jimara miriyan zêde bibe.
Zelensky: Yekane rêya rawestandina Rûsya têkbirina wê ye
Serokomarê Ukrayna Volodymyr Zelensky li ser hesabê xwe yê medyaya civakî got:
“Yekane rêya rawestandina terorîzma Rûsyayê têkbirina wê ye.”
Herî dawî Almanya, Amerîka û Brîtanyayê li hev kiribûn ku tankan bişînin Ukraynayê.
Berpirsên Ukraynayê naha banga şandina balafirên şer yên bo welat dikin.
Wezîrê Parastinê Reznikov pêşniyar kir ku Moskow ji bo êrîşek gengaz nêzî 500 hezar leşker kom kiriye.
Di meha Îlonê de, Serokê Rûsyayê Vladimir Putin bi îdiaya yekparbûna xaka welat seferberkirina giştî ya nêzîkî 300 hezar leşkeran ragihandibû.
Lê Reznikov dibêje ku hejmara rastî ya leşkerên ku li Ukraynayê hatine bicihkirin dibe ku gelek zêdetir be.
Reznikov: Jimara leşkerên Rûsya li Ukrayna ji 300 hezarî bêtir e
Reznikov ji kanala Fransî BFM re got:
“Wan bi fermî 300,000 ragihand lê li gorî nirxandina jimara rast ji vê yekê pir zêdetir e.”
Lê heta niha rêxistinên seribxwe ev dane piştrast nekiriye.
NATO: Rûsya wê bi kontrolkirina Rojhilatê Ukrayna re sînordar ne mêne
Sekreterê Giştî yê NATO Jens Stoltenberg di daxuyaniya xwe ya roja duşemê de ragihand ku ti nîşaneyek wê yekê nîne ku Rûsya wê bi kontrolkirina rojhilatê Ukrayna re sînordar bimîne.
