Hejmara qurbaniyên erdheja li Bakurê Kurdistanê û Tirkiyê nêzî 32 hezaran bû. Mexdûrên erdhejê, li kêleka êşên xwe vê carê jî bi xetereya nexweşiyan re rûbirû mane. Yekitiya Tabîbên Tirk hişyarî dabû heke tevdîr neyê girtin dê li herêmên erdhejê nexweşiyên şewbê jî belav bibin.
Erdheja li Mereşê ku 6’ê Sibatê pêkhat û bandor li 10 bajaran kir, wek yek ji kerasetên mezintirîn cihê di dîrokê de girt.
Dijwariya erdhejê ku wijdana mirovahiyê hêjand, tenê nekarî wîjdana dewleta Tirk bihejîne.
Di binê avahiyên hilweşiyayî de bi hezaran beden ji ber xemsariya dewletê canê xwe ji dest dan.
Li gorî rayedarên Tirk hejmara qurbaniyan nêzî 32 hezaran bû û bi milyonan kes jî jê bandor bûn.
Tedawiya bi deh hezaran welatî jî li nexweşxaneyan dewam dike.
Li bakurê Kurdistanê erdhejê êş û trajediyek bêdawî li pey xwe hişt
Erdhejê êş û trajediyek bêdawî li pey xwe hişt.
Li navçeya Elbistanê a Mereşê malbata Terzî yek ji wan malbatan e ku êş û dram bi serê wan de jî hatiye.
Ji malbata Terzî ku sê ferdên malbatê bûne qûrbanî, cenaze piştî 4 rojan bi awayek qerisî bûne hatine derxistin.
Haci Terzî ku keça wî û du neviyên wî canê xwe ji dest dane dibêje;
“Dema cenaze dişûştin çavên wan vekirîbûn. Li benda rizgarkirinê bûn. Lê çavên wan vekirî û qerisî çûn.”
Li bajarê Dîlokê jî ku bi hezaran kesî jiyana xwe ji dest dan tîmên lêgerîn û rizgarkirinê, di roja sêyan de hatine bajêr.
Parlementerên HDP’ê û rêveberên rêxistina partiyê ya Şirnexê serdana navçeya Nûrdaxiyê a Dîlokê kirin.
Welatiya bi nav Încî Çîrkîn ku di erdhejê de 15 xizmên wê jiyana xwe ji dest dane ji şandeya HDP’ê re, qala serpêhatiya xwe kir.
Încî Çîrkîn da zanin Bavê wê heya roja sêyan jî sax bû, lê roja çaran ew ji bin kavilan derxistin û got:
“Bi rojan mudaxile nekirin. Li benda destûrê sekinîn ji bo mudaxilekirin. Paşê kemçe û hîltî tune bûn.
Gava her tişt hat pir bi derengî ketibû.”
Serpêhatiyên li her 10 bajaran hema bêje hemû wek hev in û êş û gazincên wan ên li dijî hikumeta tirk yek in.
Heya vê keliyê jî ji gelek herêmên erdhejê re dewletê alikarî neşandiye.
Mexdûrên erdhejê yên li Bakur metirsiya belavbûna nexweşiyan heye
Li heremên erdhejê bi milyonan mexdûr bi pirsgirêkn cih, xwarin av û paqijî dijîn,
Mexdûrên erdhejê, li kêleka êşên xwe vê carê jî bi xetereya nexweşiyan re rûbirû mane.
Yekitiya Tabîbên Tirk (TTB) hişyarî dabû heke pêşîlêgirtin ango tevdîr neyê girtin dê li herêmên erdhejê nexweşiyên şewbê jî belav bibin.
