Saziya dadwerî û dezgehên ragihandinê yên Îranê ragihandin ku wê Îranê bi riya kamêreyan çavdêriyê bike û jinên ku li gorî quralan tev nagerin ceza bikin. Li aliyê din careke din li Belûcistanê ciwanek hate qetil kirin.
Piştî xwepêşandanên ‘Jin Jiyan Azadî’ di demên dawî de hejmareke zêde a jinên ku li Îran û Rojhilatê Kurdistanê lacik li serê xwe rakirine zêdetir bûye.
Dewleta Îranê jî ku vê yekê ji xwe re weke binketinekê dibîne hewil dide bi zêdekirina tundiyê pêşî li vê yekê bigire.
Wezareta Îranê ragihand jinên ku cil û bergên wan li gorî rêgezên Îslamê nebin yê bi cezayên tund re rûbirû bimîn.
Her wiha wezaretê bang li raya giştî kir û xwest ji jinên ku laçik nadin serê xwe hesab bê pirsîn.
Li gorî qanûnên şerîetê yên ku piştî Şoreşa Îslamî ya Îranê di sala 1979’an de hate sepandin, jinên li welat neçar in porê xwe bipêçin û cil û bergên li gorî şerîeta Îslamê li xwe bikin.
Jinên ku li gorî van rêgezan tevnegerin dibe ku bi cezayê pereyan û heta girtinê jî rû bi rû bimînin.
Dewleta Îranê wê bi riya kamêreyan çavdêriyê li jinan bike
Dewleta Îranê hewil dide bi riya kamerayên ku li qadên giştî û kolanan danîn, rewşê qontrol bike.
Li gorî agahiyên ku li ser malpera polîsên Îranê hatiye parve kirin wê ekîbên çavdêriyê bi riya kamêreyan çavdêriyê bike.
Saziya dadwerî û dezgehên ragihandinê yên giştî ragihandin ku êdî dê bi rêya kamerayên ku li cihên giştî û kolanan têne danîn, wê civak were şopandin.
Her wiha polîsên Îranê ji dikandaran rejî gotine ku mecbûrin li gorî qanûnê tev bigerin.
Li zahîdanê ciwanek Belûç ji aliyê çekdarên nenas ve hate qetilkirin
Li aliyê din li Zahîdanê careke din ciwaneke Belûçî hate qetilkirin.
Li gorî çavkaniya medyayên Rojhilatê Kurdistanê duh welatiyek Beluc ji aliyê çekdarên nenas ve hate kuştin.
Heman çavkaniyê diyar kir ku welatiyê hatî kuştin bi navê Mihemed Emîn Birahoyî yê 26 saliye û xelkê Zahîdanê ye.
Hêjayî gotinê ye ku li gorî nûçeyên medya navxweyî ya Îranê di sala borî de 243 welatiyên Belûc bi gulebarana raste rast ên hêzên dewleta Îranê û çekdarên nenas ve hatine kuştin.
Li gorî çavdêrên siyasî dewleta Îranê ji bo belavkirina tirsê di nava civakê de kesên ku li dijî desthilata Îranê derdikevin dike bi zanebûn dike hedef.
