Koordînasyona KJK’ê Şêrîn Elemhûlî û Leyla Qasim bi bîr anî. KJK’ê da zanîn ku Şêrîn Elemhûlî di dîroka wan ya azadiya jinê de ku bi Rêber Apo destpê kir, yekemîn jin bû ku hate darvekirin. Her wiha KJK’ê got, Leyla Qasim li dijî dîktatoriyê qîrîna berxwdanê ya kurdan e.
Koordînasyona KJK’ê daxuyaniyek weşand û şehîdên meha Gulanê bi bîr anî.
KJK’ê anî ziman ku meha Gulanê meheke welê ye bi şehadeta bi dehan hevrêyên hêja her rojeke xwe bûye kêliyên berxwedan û têkoşînê.
Leyla Qasim û Şêrîn Elemhûlî bi jiyan û berxwedana xwe bûn ji hevrêyên jin ên bêhempa ku meha Gulanê kirin meha nirxan.
“Leyla Qasim dijî dîktatoriyê qîrîna berxwedanê ya Kurdan e”
Di daxuyaniya KJK’ê de hate diyar kirin ku Leyla Qasim li dijî rejîma Saddam a dîktator, bû qîrîna berxwedanê ya Kurdên azad.
Leyla Qasim bi têkoşîna xwe ya bi rûmet ji Başûr heta Bakur, ji Rojava heta Rojhilat li çar aliyên Kurdistanê bû navê zarokên keç, bû navê kevneşopiya welatparêzî û berxwedanê. Di serî de jinên li Başûrê Kurdistanê divê jin hemû xwedî li vê mîrateyê derkevin, mezin bikin û bigihînin siberojê.
“Şêrîn Elemhûlî berxwedêra destpêkê ya tevgera azadiya jinê bû ku hate darvekirin”
KJK’ê di dewama daxuyaniyê de da zanîn ku Şêrîn Elemhûlî jî li Îranê ku nefes li jinan dihate birîn, agirê azadiya gel û jinê geş kir.
Şêrîn Elemhûlî di dîroka me ya azadiya jinê de ku bi Rêber Apo destpê kir, yekemîn jin bû ku hate darvekirin.
Dirûşma ‘Jin, Jiyan, Azadî’ ku hevala Şêrîn li dîwarên zindanê nivîsî di van serhildanan de mîna aşûtê mezin bûye û bi rengekî efsûnî li cîhanê belav bûye.
“Bi têkoşîna Şêrîn Elemhûlî û Leyla Qasim re em ê bihêztir bibin”
Koordînasyona KJK’ê destnîşan kir ku divê jinên Îranê, gel û komên baweriyan pêşengiya têkoşîna azadî û demokrasiyê bikin û got:
Bi rastiya têkoşîna me ya îro ku me ji hevrêyên xwe Şêrîn û Leyla girtiye, em bang li hemû jinan dikin ku ‘Bi Jin Jiyan Azadî re ber bi Şoreşa jinê’ ve pêngava xwe mezin bikin û bi hêztir ber bi paşerojê ve bimeşin.
