Şanderê Sekreterê giştî yê NY bo Sûriyê Geir Pedersen ragihand, vegera koçberên Sûrî di dema niha de ne-aram e.
Geir Pedersen di civîna mehane ya Konseya Ewlekariyê de rewşa Sûriyê nirxand û tiştê balkêş ew bû ku yekemîn car behsa êrîşên dagirkeriya Tirk ên bi dronan kir.
Şanderê serkreterê giştî yê NY bo Sûriyê Geir Pedersen ragihand, dem niha ji bo vegera penaberên Sûrî ne guncaw e.
Geir Pedersen duh di civîna mehane ya Konseya Ewlekariya Navdewletî de derbarê aloziya Sûriyê axivî.
Pedersen, behsa rawestandina derbaskirina alîkariyên mirovî di rêya dergehê sînorî Bab Al-Hewa re, ji ber vetoya Rûsyayê kir û mixabîniya xwe anî ziman.
Li ser destekdayîna darayî bo rewşa mirovî li sûriyê, Pedersen diyar kir, heta niha tenê 13% alîkarî hatiye berhevkirin û ji bo sendûqa herêmî ya penaberan jî kêmî 6% hatiye komkirin.
Şanderê sekreterê giştî yê NY li ser danûstandinên siyasî jî wiha got:
“Demeke dirêj a danûstandinên diplomatîk, ne li hundir û ne jî li derve, tu encamên xwe li ser erdê tunebûn.”
Geir Pedersen da xuyakririn, rewş li Sûriyê niha ne aram e û got:
“Vegera ewle û xwepexş a penaberan di dema me ya niha de ne pêkan e.
Divê penaber ji vegera bi darê zorê werin parastin, her wekî pêwîstiya parastina hemû sivîlên li hundirê Sûriyê jî.
Li Sûriyê girtin, êşkence, wendakirina bi zorê û kuştin, dewam dikin.
Yekemîn car NY behsa êrîşên dagirkeriya Tirk dike
Şanderê NY bi kurtasî behsa êrîşên li ser Sûriyê kir û got: “Hin êrîşên esmanî li Israîlê hatin girtin, hin rapor jî êrîşên bi dronan ên Tirkiyê piştrast dikin û hin êrîşên esmanî li bakurê Helebê jî, li hêzên bi ser hikumeta Şamê ve hatin vegerandin.”
Bi vî awayê şermok û bêyî eşkerekirina encam û daneyan, yekemîn car behsa êrîşên hovane yên dewleta Tirk a dagirker ji aliyê NY ve tê kirin.
Geir Pedersen behsa krîza aborî ya li Sûriyê jî kir û teqez kir ku bêhtirî 90% ji gelê Sûriyê di bin xeta hejariyê de dijî.
