Ajansa Hawarê bi boneya salvegera şehadeta rojnameger Denîz Firat beşek ji rojnivîska wê bi par ve kir.
Tê de dibêje:”Metîna heval Sarya ji min stand. Wê hevala min a herî binirx ji min stand. Dibe ku mirov ji cihekî hem hez bike, hem jî jê nefret bike.”
Weke vê rojê berî 9 salan rojnameger Denîz Firat şehîd dibe.
8’ê Tebaxê bû, dema çeteyên DAIŞ’ê êrişî Mexmûrê kirin û di êrişê de jina rojnameger a berxwedêr dibe armanc.
Ajansa Hawar bi boneya salvegera şehadeta wê, beşek ji rojnivîska wê bi par ve kir.
Tê de wiha hestên xwe yên wendakirina xwişk û rêhevala xwe şehîd Sarya rave dike:
“Di jiyana min de Metîna cihê xweşî û xemên min e.
Min li Metînayê jana dilê xwe û evîna jiyana xwe binax kir bê ku li kovaniya dilê min binêre.
Bê guman ne gengaz e ku ez wê ji jiyana xwe derxim. Metînayê heval Sarya ji min stand.
Wê hevala min a herî binirx ji min stand.
Dibe ku mirov ji cihekî hem hez bike, hem jî jê nefret bike.
Ez niha li Sezen Aksu guhdar dikim, ji bo min cihekî wê yê taybet heye.
Di jiyana min de Sezen û Ciwan Haco hevalên kêfxweşî û xemên min in.
Ez di jîna xwe de hemû êş û kêfxweşiyên xwe bi wan re ango bi dengê wan re parve dikim. ”
Şehîd Denîz Firat li ser rêhevala jiyana xwe Sarya ev gotin bi pênûsa xwe rêz kirine û jê re wiha dibêje:
Ji nepeniya rûyê te
Mistek bêdengî digerim
Ji nêrînên çavên te didim rê
Ber bi çiyayên bilind
Ber bi geliyê kûr
Bi hêviya ku di her şiverêyan de ez kenê te bibînim
Ji bo ku ramûsim peyvên di nava herdû lêvên terikî
Ew peyvên ku wateya xwe tenê di rastiya kenek bêguneh de veşartî,
Dixwazim di kenê te de bibim rêwî
Di zerya hezkirina te de bayîvana dilê xwe bi pêlên te re bikim heval
Di her hanaseyekî de
Te bijîm bê tewanbarî
Di rondikê çavên xwe de
Şopa bêrîkirinên te bigerim
Ji nalîna tunebûna te bitevize beden
Bilerize dest
Her ku pênûs li ser rûpelê lênûsa min te biresimîne bila hemû peyv bê wate bin ji kêfxweşiya dilê te.”
