Fermandar û şervanên Meclisa Leşkerî ya Minbicê bi wesîleya salvegera 7’emîn a rizgarkirina Minbicê ji çeteyên DAIŞ’ê axivîn û diyar kirin ku wan bi dijwarî şer kirin û bi israr bûn ku xelkê xwe ji DAIŞ’ê rizgar bikin û tola şehîdên xwe hilînin.
Fermandar û şervanên Meclisa Leşkerî ya Minbicê ji bo salvegera rizgarkirina Minbicê axivîn.
Fermandar Omer Mazerlî: Minbic cihekî stratîcîk e
Ji fermandarên Meclisa Leşkerî ya Minbicê Omer Mazerlî behsa girîngiya Minbicê kir û got:
“Minbic cihekî stratîcîk e û xeleka ku herêmên Reqa û Dêrazorê bi herêmên Bab û Raî ve girê dide.”
Mazerlî anî ziman ku ragihandina pêngava rizgarkirina Minbicê ji bo wan mizgîniyeke bû û wiha got:
”Beriya Minbicê, me li Kobanê, Sirîn û Şedadê şer kir, lê çavê me timî li Minbicê bû.
Di serî de şehîd Feysel Ebû Leyla xeyla wî ew bû ku Minbic û xelkê wê ji zilma DAIŞ’ê rizgar bike.”
”Em bi israr bûn ku xelkê xwe rizgar bikin”
Fermandar Omer Mazerlî di dawiyê de got: ”Me bi dijwarî şer kir.
Em bi israr bûn ku xelkê xwe ji DAIŞ’ê rizgar bikin û tola şehîdên xwe hilînin.”
Şervan Qasim El Ehmed: Em bi tilîliyan hatin pêşwazîkirin
Şervanê bi navê Qasim El Ehmed ku di pêngavê de birîndar bûyê jî derbarê mijarê de axivî.
Qasim El Ehmed behsa kêfxweşiya şêniyên Minbicê dema rizgarkirinê kir û ev tişt anî ziman:
“Dema em ber bi gundên Minbicê ve diçûn şêniyan bi tilîliyan û avêtina gulan pêşwaziya me kirin.
Kêfxweşiya wan bi xilasiya ji zulma DAIŞ’ê mezin bû.”
”Em bi berdêlên ku me dane serbilindin”
Şervan Qasim El Ehmed balkişand ser destkeftiyên ku hatine bi destxistin û wiha bi dawî kir:
“Dema em ewlehî û aramiyê dibînin, dema em dibînin gelê me bi rûmet dijî, em kêfxweş dibin.
Em bi berdêlên ku me dane serbilind in, ji ber ku ev berdêl bi serketinê tacîdar bû.”
