Hevberdevkê Înîsiyatifa ji Abdullah Ocalan re Azadî ya Bakur û Rojhilatê Sûriyeyê Îdrîs Saîd diyar kir ku rayedarên CPT’yê yên ku wan pê re hevdîtin kirine gotine ku ew ê di navbera xwe de têkildarî tecrîda li ser Îmraliyê civînekê pêk bînin.
Bi daxwaza dawîkirina tecrîda mutleq a li ser Rêber Apo û pêkanîna azadiya wî ya fîzîkî li Bakur û Rojhilatê Sûriyeyê 2 milyon û 646 hezar û 211 îmze hatin komkirin.
Hevberdevkê Înîsiyatifa ji Abdullah Ocalan re Azadî ya Bakur û Rojhilatê Sûriyeyê Îdrîs Saîd têkildarî pêngava îmzeyê axivî.
Îdrîs Saîd diyar kir ku li Îmraliyê tu qanûnên hiqûqê nayên bicihanîn û wiha got:
“Bi rêya tecrîdê dixwazin felsefeya Serok Apo ji gel dûr bixin.
Dixwazin têkoşîna azadiyê ya kurdan a li Îmraliyê biqedînin.”
“Serok Apo tekoşînê dike”
Îdrîs destnîşan kir ku tiştên li Îmraliyê diqewimin li dijî Danezana Gerdûnî ya Mafên Mirovan a NY’yê û Rêziknameya Nelson Mandela ye û ev tişt anî ziman:
“Li Îmraliyê lêgerîna şikandina vînê heye.
Lê belê li dijî vê têkoşînek bi heybet heye.
Serok Apo li ser navê bi mîlyonan kurdan têkoşîn dike.
Serok Apo vî şerî ji bo tevahiya gelên Rojhilata Navîn dimeşîne.”
”Tiştên me vegotin pejirandin”
Saîd, diyar kir ku hevdîtinên bi CPT û OHCHR a NY re erênî derbas bûne û wiha dirêjî da axaftina xwe:
“Yek ji rayedarên CPT’yê ku tev li hevdîtinê bûyî, yek ji wan kesan bû ku berê çûbû Îmraliyê û bi Serok Apo re hevdîtin kiribû.
Axaftinên me pejirandin”
Rayedarên CPT’yê diyar kirin ku ew jî xemgîn in û ew ê di navbera xwe de li ser mijarê civînekê pêk bînin.
”Her du hevdîtin jî erênî derbas bûn”
Îdrîs Saîd, diyar kir ku wan îmze û name di 9’ê tebaxê de radestî rayedarên NY’yê kirine û têkildarî hevdîtinê ev nirxandin kir:
“Me xwest şandeyekê bişînin Îmraliyê.
Her du saziyan jî anîn ziman ku kurd di têkoşîna xwe de mafdar in.
Her du hevdîtin jî erênî derbas bûn.”
”Bertek nîşanî Hêzên Navneteweyî dan”
Saîd, bal kişand ku hêzên navnetewî ji bo berjewendiyên xwe ji êriş û tecrîdê re çavên xwe digirin û wiha bi dawî kir:
“Di qanûnên NY û welatên endamên Yekîtiya Ewropayê de qala mafên mirovan tê kirin, lê tenê di gotinan de dimînin.
Ji bo berjewendiyên xwe hem ji êrîşên Bakur û Rojhilatê Sûriyeyê hem jî ji tecrîdê re çav û guhên xwe digirin.”
