Ukrayna ku ev nêzî 2 sal in li dijî Rûsyayê şer dike, plan dike ku di sala nû de welatiyên xwe yên li Almanyayê tevlî artêşê bike.
Wezîrê Parastinê yê Ukraynayê Rustem Umerov diyar kir ku kesên bangawaziyê bi cih neynin dê bên cezakirin.
Her wiha Umerov diyar kir ku ew di wê baweriyê de ne ku Amerîka dest ji piştgiriya welatê xwe bernede.
Wezîrê Parastinê yê Ukraynayê Rustem Umerov diyar kir ku welatiyên Ukraynayê yên temenê xwe guncav ên li Almanyayê dijîn wê di sala 2024’an de ji bo leşkeriyê bên gazîkirin.
Umerov di hevpeyvîna xwe ya ligel Bild, Welt TV û Politico de diyar kir ku dê ji hemû Ukraynayî yên di navbera 25-60 salî re bangewaziya leşkerkirinê bê şandin.
Derbarê planên leşkerkirina kesên ku li Almanyayê dijîn, Wezîrê Parastina Ukraynayê got:
“Em dixwazin bi her kesî re adil bin, ji ber ku mijar ewlehiya welatê me ye.
Em ê vexwendinekî bişînin ji Ukrayniyên li Almanyayê re.
Vegerîna welat û xîzmetê artêşê kirin mafê wan e.”
Rustem Umerov her wiha bal kişand ser wê yekê ku kesên ku banga çekan negirin dê bên cezakirin û got:
“Niha em nîqaş dikin ka dê çi were serê kesên ku bi dilxwazî neyên.
Parastina welatê xwe ne ceza ye, rûmet e.”
Umerov bawer dike wê Amerîka piştgiriyê xwe bidomîne
Umerov diyar kir ku ew di wê baweriyê de ne ku Amerîka dest ji piştgiriya welatê xwe bernede û got:
“Ew hêviyê didin me ku em ê li gorî planên xwe tevbigerin.”
Kesayetên sereke yên Senatoya Amerîkî roja Sêşemê ragihandin ku Kongres dê îsal alîkariya leşkerî ya nû ji Ukraynayê re nepejirîne.
Sedema vê yekê jî ew e ku Komarparêzên muxalefetê li dijî dayîna alîkariyên zêdetir bo Kîevê ne.
Cotmeha borî, serokê Amerîkayê Joe Biden bang li Kongresê kiribû ku pakêtek nû ya alîkariyê ya 61 mîlyar dolarî ji bo Ukraynayê bipejirîne.
