Derhênera Fransî Mylène Sauloy yê li ser tevgera Kurd fîlm çêkirine, diyar kir ku têkoşîna jinên Kurd xwedî girîngiyek mezin e û got:
“Rêber Apo hem ji aliyê teorîk hem jî ji aliyê pratîkî ve pêşengekî rast ê têkoşîna jinê ye.”
Derhênera Fransî Mylène Sauloy yek ji wan navên ku ji bo têkoşîna jinên Kurd û azadiyê baştir bê naskirin ked dide.
Mylène Sauloy, zêdeyî 30 sal in li ser Têkoşîna Azadiya jinên Kurd xebat dimeşîne.
Derhêner Mylène Sauloy li ser xebata xwe û Şoreşa Rojava ku ji nêz ve dişopîne axivî.
Mylèn, diyar kir ku muzîk di nava Kurdan de ragirê rastîn ê dîrokê ye û wiha got:
“Hemû dîroka ku hatiye qedexekirin bi rêya muzîkê tê bihîstin.
Ji bo vê me fîlma yekem li ser mûzîka kurdî di sala 1998’an de kişand.
Rêxistinbûyînek siyasî li Bakur hebû ku jin di navde xebat dimeşand, pir bala min kişand.
Ev rêxistin gelek bandor li min kir û piştre min xwe di nava vê xebatên têkoşîne de dît.”
“Têkoşîna jinên Kurd ji bo tevahî herêmê mînak e”
Mylèn, anî ziman ku ew fîlm li ser Têkoşîna jinên kurd yên li Başûr, Qedîl û Şengalê çêkir û navê wê kir ‘Şoreşa Keçan’ û wiha behs kir:
“Ji ber jinên ku min li Qendîl, Şengal û Rojava nas dikir ciwan bûn û piraniya wan tevlî şoreşê bû û şerê DAIŞ’ê dikirin.
Fîlma din jî, ji bo ez rola jinên şoreşger bidim pêş, min navê wê kir ‘Şoreşa Jinê’.
Di vê fîlmê de min xwest têkoşîna 40 salan vebêjim.”
“Tirkiye xeteriyeke mezin e li ser Bakur û Rojhilatê Sûriyê”
Mylèn, destnîşan kir ku modela jiyanê ya ku çavkaniya cîhanê ye, îro dibe hedefa dagikeriya Tirkiyê û wiha domand:
“Tirkiye ji bo ku êrîş bike PKK’ê weke hincet nîşan dide û li hember wê jî sivîlan dike armanc.
Dewleta Tirk dixwaze gelê herêmê bidin bawerkirin ku YPG û hêzên kurd ên herêmî ji bo wan xeternak in.
Lê Tirkiye bi xwe xeteriyeke mezin e li ser Bakur û Rojhilatê Sûriyê.”
Mylèn, diyar kir ku Rêber Apo ji bo jin mafên xwe bi dest bixin, kedeke mezin daye û got:
“Rêber Apo ji bo jinên Kurd rêya rast e”
“Rêber Apo dibêje rizgariya gelê Kurd û jin bi hev ve girêdayî ne.
Rêbertî di rola jinê di şoreşê de û di avakirina civakeke nû de pêşengekî rast e.”
Mylèn Sauloy, di dawiyê de da zanîn ku ew amadekariya fîlmeke li ser girêdana mûzîk û Şoreşa Rojava dike.
