Hiqûqnasan destnîşan kirin ku bi cezayên di Doza Kûmpasê ya Kobanê hatine dayîn de, car din derket holê ku daraz li ser esasê fermanên siyasetê tevdigere û gotin:
“Di vê dozê de tiştekî ku li ser navê hiqûqê were nîqaşkirin, nîne.
Bi van cezayan hewl didin derbeyekî li têkoşîna gelê Kurd bidin.
Lê belê berxwedêr wê gotina dawiyê bêjin!”
Şermezarkirinên li hemberî biryarên di Doza Kûmpasê ya Kobanê de hatine girtin, didomin.
Herî zêde jî hiqûqnas nerazîbûn nîşanî vê dozê didin.
Têkildarî vê yekê ji Komeleya Hiqûqnasên Serdemê (ÇHD) Çîgdem Akbûlût, Rêveberê Nobetên Edaletê Kemal Aytaş û ji Komeleya Hiqûqnasên Ji bo Azadiyê (OHD) Sînan Zîncîr ji ANF’ê re axivîn.
Çîgdem Akbûlût: Ev cezayên hatine dayîn, wê têkoşînê paş nexîne
Seroka Şaxa Stenbolê ya ÇHD’ê Çîgdem Akbûlût destnîşan kir ku biryarên di Doza Kûmpasê ya Kobanê de hatine dayîn, di aliyê hiqûqî de ti derbasdariya wê nîne û got:
“Bi cezayên hatine dayîn, hewl didin vê peyamê bidin, ’em ê êrîşên xwe yên li ser têkoşîna hebûnê ya gelê Kurd bidomînin.
Ne siyasetmedarên hatine darizandin, ne hevalên me yên têkoşînê, ne parêzer û ne jî hempîşeyên me; ti kes ji vê biryarê ne tirsiya, xwe ne vekişand û dest ji tiştên ku jê bawer dike berneda.
Lewma ev cezayên hatine dayîn jî wê têkoşînê paş nexîne.”
Kemal Aytaç: Di vê dozê de tiştekî ku li ser navê hiqûqê were nîqaşkirin, nîne
Rêveberê Nobetên Edaletê parêzer Kemal Aytaş destnîşan kir ku bi vê doza kûmpasê re car din derket holê ku daraz li ser esasê fermanên siyasetê tevdigere û wiha got:
“Di vê dozê de tiştekî ku li ser navê hiqûqê were nîqaşkirin, nîne.
Ti îspat nîne ku sûc hatiye kirin. Bi van cezayan hewl didin derbeyekî li têkoşîna gelê Kurd bidin.
Di heman demê de hewl tê dayîn ku vê peyamê bidin muxalîfan, ‘Dengê xwe zêde dernexin, eger hûn derkevin kolanan, muxalefeteke cidî bikin em ê we bigirin û ceza bikin’.
Bi vê dozê re dixwazin tirsê berdin nav civakê.”
Parêzer Sînan Zîncîr: Siberoj ên me ne
Ji OHD’ê parêzer Sînan Zîncîr diyar kir ku ev biryar ji bo hêviya gelan a aştiyê û siberoja gelan derbeyek giran e û wiha got:
“Mîna ku Seyîd Riza û Şêx Seîd teslîm nebûn û serî netewandin, Selahattîn Demîrtaş û Fîgen Yuksekdag jî teslîm nebûn.
Mîna Fîgen jî gotî, berxwedêr wê gotina dawiyê bêjin, gelê Kurd wê bêje, şoreşger û sosyalîst wê bêjin. Siberoj ên me ne.”
