Rûsya gef li Îngilîstanê xwar, ku heger li ser axa Rûsyayê çekên Îngîlîzan were bikaranîn, dê Rûsyayê hedefên wan bixe.
Her wiha serokdewletê Rûsyayê Vladîmîr Pûtîn biryarnameya ku destûrê dide bikaranîna mal û milkên Amerîkayê li Rûsyayê îmze kir.
Li aliyê din piştî tetbîqata çekên nukleerî ya Rûsyayê, Fransayê jî moşekên ku dikarin serikên nukleerî hilgirin ceribandin.
Berdevka Wezareta Derve ya Rûsyayê Mariya Zaxarova hişyarî da hewldanên Îngilîstanê.
Mariya Zaxarova di derbarê bikaranîna çekên Ingilîzan li ser xaka Rûsyayê de daxuyanî da çapemeniyê û got,:
“Heger senaryoyek wiha çêbibe, Rûsya dikare “li ser xaka Ukraynayê û derveyî sînorên wê” li hedefên Ingilîstanê bixe.”
Putin biryarnameya bikaranîna milkên Amerîkayê li Rûsyayê pejirand
Her wiha serokdewletê Rûsyayê Vladîmîr Pûtîn biryarnameya ku destûrê dide bikaranîna mal û milkên Amerîkayê li Rûsyayê îmze kir.
Piştî ku Pûtîn biryarname îmze kir li ser malpera fermî ya nûçeyan hat weşandin.
Li gorî biryarnameyê, xwediyên mafên Rûs ên ku mal û milkên wan ji aliyê Amerîkayê ve hatine desteserkirin, dikarin ji bo tazmî-nata zirara ku gihandine serî li dadgehê bidin.
Xwediyên mafan dê bikaribin mal û milkên Amerîkayê yên li welêt bikar bînin da ku zirarên ku di encama dozê de hatine destnîşankirin vegerin.
Piştî ku êrîşên Rûsyayê li ser Ukraynayê di Sibata 2022’yan de dest pê kir, Amerîka û hevalbendên wê nêzîkî 300 milyar dolar samanên Rûsyayê cemidandin.
Senatoya Amerîkayê di 24’ê Nîsanê de şandina samanên Rûsyayê yên cemidkirî ji Ukraynayê re pejirand.
Rageşiya çekên nukleerî ya li ser xeta Rûsya-Fransa
Li aliyê din piştî tetbîqata çekên nukleerî ya Rûsyayê, Fransayê jî moşekên ku dikarin serikên nukleerî hilgirin ceribandin.
Rojnameya The Guardian ku yek ji rojnameyên navdar ên Îngilîstanê ye, amaje bi wê yekê kir ku tetbîqata Fransayê piştî ceribandina moşekên navokî yên Rûsyayê pêk hat.
Di daxuyaniya Wezareta Parastinê ya Rûsyayê de hat destnîşankirin ku bi moşekên Îskender û Kinjal ên ku dikarin serikên nukleerî hilgirin tetbîqat hat lidarxistin.
Tetbîqat li Herêma Leşkerî ya Başûrê Rûsyayê hatin lidarxistin.
Navçeya navborî di nav xwe de Kirima ku Rûsyayê di sala 2014’an de girêdabû û herwiha 4 herêmên li başûrê Ukraynayê ku di sala 2022’yan de bi dest xistibûn, dihewîne.
