Şerê li Şerîda Xezayê heya niha ji bilî karesateke mirovî ti encam nedaye.
Dîsa di vê şerê de herî zêde jî jin, zarok û temen mezin dibin armanca êrîşên tund.
Li hin heremên ku artêşa Îsraîl vekişiyaye lêgerîn û rizgarkirina mirovan hatiye destpêkirin.
Lê li gor daneyên Komîteya Xaça Sor a Navneteweyî ji destpêka şer ve nêzî 6 hezar û 400 Filistînî winda bûne.
Artêşa Îsraîlê roja Çarşemê daxuyanî da û ragihand ku operasyona ku 27’ê Hezîranê li Suçaiyyeyê hatî destpêkirin, bi dawî bû.
Ku di vê operasyonê de “8 tunel” hatin hilweşandin û “bi dehan kes” hatin kuştin.
Xebatkarên rewşa lezgîn, niha li avahiyên hilweşiyayî li qurbanan digerin.
Li Xezayê di bin kavilan de nêzî 60 cenaze hatin dîtin
Berdevkê parastina sivîl ragihand ku “ji sedî 85 avahiyan zirareke cidî dîtine” û diyar kir ku heta niha nêzî 60 cenaze dîtine.
Artêşa Îsraîlê li navenda bajarê Xezayê, “navenda UNRWA” operasyonên xwe didomîne.
Îsraîl dibêje li vê navendê şervanên Hamasê hene.
Li Başûrê bajêr jî şer û li rojava bombebaran didomin.
Xaça Sor: Bi hezaran Filistînî li Xezayê winda ne
Artêşa Îsraîlê piştî 4 rojan ji êrîşên dijwar ên li başûrê rojavayê bajarê Xezayê beşek ji herêmê vekişiya.
Piştî vekişîna hêzên Îsraîlî, cesedê 56 kesan di bin kavilên bi sedan malên wêrankirî û şewitî û li ser rêyan de hatin dîtin.
Komîteya Xaça Sor a Navneteweyî (ICRC) di daxuyaniya xwe ya derbarê rewşa Xezeyê de ragihand ku li herêmê bi hezaran Filistînî winda ne.
Xaça Sor: 6 hezar û 400 Filistînî winda bûne
Komîteya Xaça Sor a Navneteweyî ragihand ku ji 7ê Cotmeha 2023’yan vir ve nêzî 6 hezar û 400 Filistînî winda bûne.
Li gorî nûçeya The Guardian gelek ji van kesan tê bawer kirin ku di bin kavilan de hatine veşartin an bêyî nasname hatine veşartin.
Her wiha tê texmînkirin ku hin kesên winda ji hêla Îsraîlê ve hatine binçavkirin.
Komîteyê destnîşan kir ku ji Nîsanê û vir ve nêzî hezar û 100 kesên winda yên nû ji wan re hatine ragihandin lê hîn jî nehatine dîtin.
NY: Em li ber windakirina nifşekî zarokan in
Li aliyê din Rêvebira Ragihandinê ya Ajansa UNRWA’yê Juliette Touma ragihand ku li Xezayê di bin êrîşên Îsraîlê de ew li ber windakirina nifşekî zarokan in.
Di vîdyoya ku li ser hesabê fermî yê X’ê ya Ofîsa Cenevre ya Neteweyên Yekbûyî hat parvekirin de, Juliette Touma der barê rewşa zarokên li Xezeyê yên di bin êrîşên Îsraîlê de agahî da.
Juliette Touma diyar kir ku ji roja ku êrîşên Îsraîlê dest pê kirine heta niha herî kêm 600 hezar zarok nikarin biçin dibistanê û destnîşan kir ku gelek dibistan hatine girtin û dibistanên UNRWAyê jî kirine stargeh.
Juliette Tûma destnîşan kir ku dema zarok ji dibistanê dûr bikevin dê telafîkirina windahiyên wan ên di perwerdeyê de zehmet be.
