Hevserokê PYD Salih Muslim diyar kir ku PYD partiyeke dogmatîk nîn e, lê partiyeke dînamîk e ku li gorî pêwîstî û geşedanên rû didin tev digere.
Muslim anî ziman ku PYD’ê amade ye pêşengiya avakirina yekitiya neteweyî ya kurdî bike.
Her wiha Muslim diyar kir ku sibe kongreya 10. de wê guhertin çêbibin.
Hevserokê Partiya Yekitiya Demokratîk (PYD) Salih Muslim bi boneya salvegera 21’an a damezirandina PYD’ê axivî.
Salih Muslim mercên ku partî tê de ava bûne, astengiyên li pêşiya partiyê derketine, rola PYD’ê di Serhildana Qamişloyê ya 2004’an de nirxandin.
Salih Muslim têkildarî mercên ku PYD tê de ava bûye got:
“Partiya me di merc û pêvajoyeke objektîf de ava bûye. Pêwîstiya wê pêvajoyê bi partiyekê hebû ku pêşengiya gelê Rojava û herêmê bike.”
Salih Muslim: Berî partî ava bibe me gelek gav avêtin lê bi serneket
Muslim bi bîr xist ku bingeha têkoşînê di salên 90’î de hebû lê pêwîstiya wê bi bihêzkirin û birêxistinkirineke zêdetir hebû û wiha anî ziman:
“Gelên xwediyên dozekê yên banga mafên xwe dikin hewcedarî rêxistina siyasî ne.
Li ser vî esasî beriya avakirina partiyê jî hewldanên me hebûn ku tevgerek were avakirin da ku nûnertiya Rojava bike.
Me gelek gav avêtin lê bi ser neketin.
Li ser vê yekê me bi rewşenbîr û kesayetên civakî re biryar da.
Me di Îlona 2003’yan de kongreyek li dar xist. Di wê kongreyê de PYD hat avakirin.”
Salih Muslim: Têkoşîna me 21 salin berdewam dike
Muslim anî ziman ku armanc ji avakirina PYD’ê avakirina rêxistinekê bû ku pêşengiya têkoşînê bike û nûnertiya mafên gelê Rojava bike û got:
“Têkoşîna me ya 21 salan li ser bingeha perwerdekirin û birêxistinkirina gel berdewam dike.”
“Me xeta xwe parast”
“Serhildana Qamişloyê ji bo me û ji bo gelê me ezmûnek bû.” Bi van gotinan Salih Muslim bal kişand ser rola PYD’ê di Serhildana Qamişloyê ya 2004’an de:
“Dema serhildanê temenê partiya me çend meh bû. Tevî vê yekê jî me gelê xwe bi rêxistin kir. Rejîmê û dijminê gelê Kurd êrişên dijwar bi ser me de anîn. Hin partiyên siyasî yên kurdî yên ditirsiyan, em kiribûn hedefa xwe.”
Salih Muslim: Belê me êş dît û em westiyan, lê em bi dawî nebûn, em bi ser ketin
Salih Muslim bi bîr xist ku PYD’ê di çarçoveya serhildanê de gelek şehîdan dan û ev li gotinên xwe zêde kir:
“Di serhildanê de me gelek şehîd dan. Hevalên me xistin girtîgehan.
Bi hezaran jî gelê me di girtîgehan de îşkence li wan hat kirin.
Belê me êş dît û em westiyan, lê em bi dawî nebûn, em bi ser ketin.”
Muslim îşaret pê kir ku wan bi moraleke xurt gel bi rêxistin kir û gelek destkeftî bi dest xistin û got:
“Ji derveyî xebatên ku partiya me kirine, em keda gelê Rojava ji bîr nakin. Em spasiya wî dikin.”
Salih Muslim: PYD li gorî pêwîstiya gelê xwe tev digere
Hevserokê PYD’ê Salih Muslim her dawî ev yek anî ziman:
“Em partiyeke dogmatîk nîn in, lê belê em partiyeke dînamîk in ku li gorî pêwîstiyan tev digere û li gorî siyasetên nû û Şerê Cîhanê yê Sêyemîn xwe nû dike.”
