Ji Parlamentoya Ewropayê 21 parlamenteran ji Cîgirê Serokê Komîsyona Ewropayê re nameyek şandin.
21 parlamenterên ji Parlamenta Ewropayê li dijî êrişên dewleta tirk ên li ser gelê Bakur û Rojhilatê Sûriyeyê nameyek ji Nûnera Bilind a Polîtîkaya Ewlekariyê û Karên Derve ya Yekitiya Ewropayê û Alîkara Seroka Komîsyona Ewropayê Kaja Kallas re nivîsîn û bang li Komîsyona Ewropayê kirin ku bi erka xwe rabe.
Nameya parlamenterên ji Çep a Yekbûyî ya Ewropayê, Kesk/Koma Azadiyê ya Ewropayê, Koma Çep a Parlamenta Ewropayê, Koma Reformîst û Muxafazakaran a Ewropayê, Tifaqa Demokrat û Sosyalîstan û parlamenterên serbixwe bi vî rengî ye:
“Birêz Kallas,
Em fikarên xwe yên li ser Sûriyeyê bi taybetî jî li ser paşeroja gelê Rêveberiya Xweser a Bakur û Rojhilatê Sûriyeyê bi we re parve dikin.
Rêveberiya Xweser mîna we daxwaza Sûriyeyeke aştiyane, pirrengî, aram dixwaze ku ji aliyê gelê Sûriyê ve were birêvebirin.
Di valahiya siyasî ya ji ber Şerê Navxweyî yê Sûriyê de ji kêliya ku kontrola herêmê xiste destê xwe û vir ve, her wiha piştî ku herêm ji DAIŞ’ê hate rizgarkirin, ev pîvan bû bingeha sîstema Rêveberiya Xweser.
Di nava şerê navxweyî de jiyaneke bi hev re ya aştiyane û giraveke ji mafên jinan ava kirin û ev yek ji bo tevahiya Sûriyeyê weke modelekê nîşan da ku xwe weke parçeyek ji Sûriyê dibîne.
Lê belê niha ku dema biryardanê li ser Sûriyê ye, ev modela aştiyane, pirçandî û femînîzmê di bin êrişên belasebep ên milîsên dewleta Tirk de ye û di bin gefa dagirkeriyê ya dewleta Tirk de ye.
Di vê demê de ku li ser paşeroja Sûriyê bi gelek aliyên cuda re hevdîtinên cuda û danûstandin têne kirin, qala tevlîbûna Rêveberiya Xweser û Hêzên Sûriya Demokratîk a li danûstandinan û entegrasyona wan a li Komara Sûriyê ya nû tê kirin.
Rêveberiyeke nenavendî pêşniyar dikin û di heman demê de destnîşan dikin ku li hemberî metirsiyên derve dikarin xwe biparêzin.
Ev encamên hevdîtinên hesas û girîng ji bo Sûriyê û paşeroja wê gelekî girîng e.
Em vê nivîsê dinivîsînin, ji bo Komîsyona Ewropayê bandora xwe bi kar bîne, piştgiriyê bide vê civaka demokratîk û xweşbîn, zextê li Tirkiyeyê bike ku êrişkariya xwe bisekinîne.
Em bala we bi taybetî dikişînin ser rewşa li Bendava Tişrînê ku li ser çemê Firatê ye ku di bin êrişa dewleta Tirk de ye.
Ev êriş bû sedem ku heta niha nêzî milyonek mirov ji elektrîk û çavkaniyên avê bêpar bimînin û rîsk heye ku eger bendav hilweşe wê felaketeke mezin rû bide.
Herikîna avê dikare Bendava Tebqayê jî derbas bike û hilweşîn dikare bigihêje heta Iraqê, bibe sedem ku bi sed hezaran penaberên nû rû bidin.
Gelê xwecihî ku ji bo balê bikişîne ser vê gefê, li bendavê xwepêşandanên şermezarkirinê lidar dixe, lê belê gelek caran ji aliyê hêzên hewayî yên Tirkiyeyê ve hate bombekirin û herî kêm 17 kes hatin kuştin, gelek kes jî birîndar bûn.
Êrişên Tirkiyeyê yên li ser herêmên sivîl dewam dikin. Ji destpêka meha Kanûnê û vir ve di êrişên Tirkiyeyê de nêzî 100 sivîlan jiyana xwe ji dest dan.
Ambûlans hatinb ombekirin, sûîqest li rojnamevanan hate kirin û depoyên genim hatin xerakirin.
Her wiha em fikarên xwe yên li ser bi hezaran mehkûmên DAÎŞ’ê û malbatên wan ên radîkalbûyî tînin ziman ku ji bo xilasiya ji dîlgirtinê hêviya xwe bi Tirkiyeyê ve girêdane.
Em hêvîdar in ku Yekitiya Ewropa li hemberî vê destwerdana hilweşîner û derve ya metirsîdar, piştgiriyê bide pêşketinên mînak ên bi pêşengiya Sûriyeyiyên li Bakur û Rojhilatê Sûriyeyê, başiya wan ji bo paşeroja Sûriye û tevahiya Rojhilata Navîn e, ji bo ewlehiya me hemûyan e.”
Parlamenterên name îmze kirin
Parlamenterên ku mohra xwe danîne binê nameyê ev in:
- Per Clausen
- Leoluca Orlando
- * Andreas Schieder
- * Pernando Barrena (GUE/NGL)
- Leila Chaibi (GUE/NGL)
- Ozlem Demîrel (GUE/NGL)
- Sebastian Everding (GUE/NGL)
- Emmanouil Fragkos
- Hanna Gedin (GUE/NGL)
- Elisabeth Grossmann (S&D)
- Hannes Heide (S&D)
- Nathalie Loiseau (Renew)
- Vincent Marza Ibanez
- Costas Mavrides (S&D)
- Nikos Papandreou (S&D)
- Thijs Reuten (S&D)
- Ilaria Salis (GUE/NGL)
- Guenther Sidl (S&D)
- Jonas SJöstedt (GUE/NGL)
- Maria Cecilia Strada (S&D)
- Maria Zacharia
