Jinên Efrînî û Meclisa Edaleta Civakî ya Kantona Cizîrê beşdariya serçeteyên dewleta Tirk a dagirker di kongreya Şamê de şermezar kirin û banga darizandina çeteyan kirin.
Bi dehan jinên Efrînî yên ku bi darê zorê ji malên xwe hatin koçberkirin, li dijî beşdarbûna çeteyê bi navê Hatim Ebû Şeqra, kujerê Sekretera Giştî ya Partiya Sûriya Pêşerojê Hevrîn Xelef di kongreya Şamê ya ku roja Çarşemê 29’ê Çileyê hat lidarxistin de, li bajarê Qamişlo çalakiyek lidar xistin.
Beşdaran şaxên zeytûnê û pankartên “Em ê li te vegerin Efrîn” û “Em vegerek bi ewle dixwazin” hilgirtin.
Di çalakiyê de daxuyaniye bi zimanê Kurdî û Erebî ji hêla beşdarên çalakiyê Şêrîn Hisên û Leyla Hesen ve hate xwendin.
Di daxuyaniyê de beşdarbûna serkirdeyên çeteyên dewleta Tirk a dagirker di kongreya dawî ya li Şamê pêk hat de, hate şermezarkirin.
Jinan bang li rêxistinên mafên mirovan kirin ku dozên der barê wan çeteyan de bigînin Dadgeha Cezayê ya Navneteweyî.
Der barê mijarê de Meclisa Edaleta Civakî ya Kantona Cizîrê bi daxuyaniyekê ku li ber avahiya dadgehê ya bajarê Qamişlo hate xwendin, beşdarbûna kujer û çeteyan di siberoja welat de şermezar kir û ji rêxistinên navdewletî xwest ku wan kujeran di dadgehên navdewletî de dagirzînin.
