Cenazeyê şervanê QSD’ê Beşar (Mihemed Selal) bi merasîmekê li Pakrewangeha Şehîdan a li bajarê Şedadê hat definkirin û şehîd Hisên (Mihemed Ugle El Îbrahîm) hat bibîranîn.
Meclisa Malbatên Şehîdan ya bajarê Şedadê yê kantona Cizîrê ji bo şervanê QSD’ê Beşar (Mihemed Hemed Selal) ku 3’yê Sibatê li Dêra Zorê şehîd bûbû, merasîma cenaze û ji bo şervanê QSD’ê Hisên (Mihemed Ugla El Îbrahîm) ku 15’ê Çileyê di berxwedana li Bendava Tişrînê şehîd bûbû, merasîma xiyabî li dar xist.
Merasîm li Pakrewangeha Şehîdan a bajarê Şedadê bi amadebûna girseyeke mezin a şêniyên bajar û gundewarên Şedadê, endam û rêveberên saziyên sivîl û malbatên şehîdan hat lidarxistin.
Merasîm bi deqeyeke rêzgirtinê û toraneke leşkerî ya şervanên QSD’ê dest pê kir. Piştre endamê Meclisa Malbatên Şehîdan a Şedadê Ehmed El Ewed axivî.
El Ewed piştî sersaxî da bal kişand fedakariyên ku şehîdan dane û got: “Van şehîdan ji bo parastina rûmeta gelê xwe canê xwe feda kirin.”
El Ewed di dawiya axaftina xwe de soza domandina rêya şehîdan da.
Ji fermandarên Meclisa Leşkerî ya Şedadê Şiyar Şedadê jî sersaxî ji malbatên her du şehîdan re xwest û diyar kir şehîdan di rêya azadiya gelê xwe û ewlehiya welat de têkoşiyan û şehîd bûne.
Şiyar Şedadê diyar kir ku bi saya şehîdan welat ava dibin û soza pêkanîna xeyalên wan da.
Piştre wesîqeyên her du şehîdan hatin xwendin û radestî malbatên wan hatin kirin. Cenazeyê şehîd Beşar bi dirûşma û tilîliyên dayikan hat definkirin.
