Îro artêşa Îsraîlê gule berda ser sivîlan ku ji bo wergirtina alîkariyê di rêzê de bûn.
Rayedarên Parastina Sivîl a Xezayê ragihandin di êrişa artêşa Îsraîlê de herî kêm 31 kes hatin kuştin, 200 kes jî birîndar kirin.
Li gorî daxuyaniyê, êrîş li hemberî girseya gel hate kirin ku ber bi navenda alîkariyê ya saziya bi navê GHF ve diçû.
Berdevkê Parastina Sivîl Mahmûd Bassal daxuyanî da AFP’ê û got:
“Bi tank û balafirên bêmirov gule li hezaran sivîlan hate barandin ku dixwestin alîkariya xwarinê werbigirin.
Herî kêm 31 kes jiyana xwe ji dest dan û 200 birîndar jî rakirin nexweşxaneyan.”
Li gorî Bassal bi hezaran Fîlîstînî bi şev li hev kom bûbûn, ji bo karibin xwe bigihînin navenda alîkariyê ya GHF’ê.
Serê sibehê saet di 05:30’î de jî bi tankan her wiha bi droneyan êrîşeke giran li sivîlan hate kirin.
Her wiha Wezareta Tenduristiyê jî ragihand ku hêzên Îsraîlê li heremên cuda yên Xezayê êrişên hewayî û topan pêk aniye.
Di êrîşeke balafirên bêmirov a Îsraîlê de li bakurê Kampa Penaberan a Nuseyratê li navenda Şerîda Xezayê du kes hatin kuştin û kesek birîndar bû.
Di êrîşên hewayî yên ku li Xan Yûnisê li başûrê Şerîda Xezayê kirin de 9 kes hatin kuştin.
Di heman demê de kesek din jî ji nav kavilên bajarokê Ebasan el-Kebira, li rojhilatê bajêr, ku bombebarana giran lê berdewam dike, hate derxistin.
Ev pêşketin di demekê de tên ku şerê berfireh ê Îsraîlê li Şerîda Xezzeyê berdewam dike û rêxistinên mirovî hişyar dikin ku şert û mercên jiyan û tenduristiyê yên sivîlên di bin dorpêçê de xirabtir dibin.
Netanyahu: Di danûstandinên girtiyan de pêşketinên girîng hene
Li aliyê din serokwezîrê Îsraîlê Benjamin Netanyahu beriya rûniştina îro ya ji bo nîqaşkirina pêşniyara hilweşandina parlamentoya Îsraîlê, Knesset, mijara girtiyên ku ji hêla Hamasê ve li Xezayê têne girtin, anî ziman.
Di daxuyaniyekê de Netanyahu dibêje di danûstandinên girtiyan de “pêşketinek girîng” hatiye bidestxistin.
Netanyahu wiha domand:
“Hê zû ye ku meriv li ser hêviyan biaxive, lê niha em bê westan, roj û şev dixebitin.
Ez hêvî dikim ku em karibin pêşketinê bikin.”
