Li aliyê din piştî êrişên Îsraîlê ya li dijî Îranê li welatên cîhanê bertek,daxuyanî û nirxandin hatin kirin.
Di daxuyaniyan de welatan fikarên xwe anîn ziman û banga kêmkirin û rawestandina rageşiyê kirin.
Piştî êrişên Îsraîlê ya li dijî Îranê li welatên cîhanê bertek û nirxandin hatin.
Erebistana Siûdî: Êrişa Îsraîlê serwerî û ewlehiya Îranê lewaz dike
Wezareta Karên Derve yê Erebistana Siûdî êrişa Îsraîlê şermezar kir.
Di daxuyaniya wezaretê de hat gotin êrişa Îsraîlê serwerî û ewlehiya Îranê lewaz dike û binpêkirina eşkere ya qanûn û pîvanên navneteweyî ye.
Brîtanya: Zêdebûna êrîşan ne di berjewendiya kesî de ye
Wezîrê Derve yê Brîtanyayê David Lammy jî dibêje ew ji ber êrişên Îsraîlê bi fikar in.
Lammy li ser malpera xwe ya fermî X’ê got:
“Ez ji ber dîtina nûçeyên êrîşan bi fikar im.
Her zêdebûneke din a êrîşan gefek cidî ye li ser aştî û aramiya herêmê û ew ne di berjewendiya kesî de ye.”
Keir Starmer: Dema vegera dîplomasiyê ye
Ji aliyekî din ve, Serokwezîrê Brîtanî Keir Starmer got hikûmeta wî bang li “hemû aliyan kiriye ku paşve gav bavêjin û tavilê rageşiyê kêm bikin” û got:
“Niha dema vegera nermbûnê, aramiyê û dîplomasiyê ye.”
Mark Rutte: Ev kiryarek yekalî ye, kêmkirina rageşiyê pir girîng e
Her wiha Sekreterê Giştî yê NATO’yê Mark Rutte diyar kir ji bo hevalbendên Îsraîlê “pir girîng e” ku ji bo kêmkirina rageşiyê bixebitin.
Rutte got:
“Bê guman rewşek bi lez pêş dikeve. Ev kiryarek yekalî ya Îsraîlê bû.”
Trump: Ger pêwîst be em ê Îsraîlê biparêzin
Li aliyê din Serokê Amerîkayê Donald Trump piştî êrişên Îsraîlê daxuyanî da û diyar kir ew hêvî dikin ku pêvajoya danûstandinên nukleerî bi Îranê re bidomînin û got:
“Ger pêwîst be em ê Îsraîlê biparêzin.
Îran nikare bibe xwedî bombeya nukleerî û em hêvî dikin ku vegerin ser maseya danûstandinan.”
Berê mirin û wêraniyeke mezin çêbûye, lê hîn jî dem heye ku ev komkujî bi dawî bibe ji ber ku êrîşên din ên hatine plankirin dê hîn girantir bin.”
Awistralya: Xetera bêîstîqrarkirina herêmê heye
Her wiha Wezîra Derve ya Awistralyayê Penny Wong dibêje ew “ji ber zêdebûna rageşiya di navbera Îsraîl û Îranê de bifikar in û got:
“Ev rewş xetereya bêîstîqrarkirina herêmeke jixwe ne aramtir dike.
Em bang li hemû aliyan dikin ku xwe ji kiryar û daxuyaniyên ku dê rageşiyê bêtir zêde bikin dûr bigirin.”
Peskov: Rûsya ji zêdebûna rageşiya tund bi fikar e
Rûsya jî bertek nîşanî êrişa Îsraîlê da.
Berdevkê Kremlînê Dmitry Peskov li paytext Moskowê derbarê êrîşa Îsraîlê ya li ser Îranê de daxuyanî da rojnamevanan.
Peskov destnîşan kir ku Serokê Rûsyayê Vladimîr Pûtîn bi berdewamî ji rageşiya di navbera Îsraîl û Îranê de tê agahdarkirin û got:
“Rûsya ji zêdebûna rageşiya tund bi fikar e û wê şermezar dike.”
Berdevk Peskov diyar kir ku Wezareta Derve ya Rûsyayê dê di demek nêzîk de li ser talîmatên Pûtîn daxuyaniyek berfireh li ser rewşa di navbera Îsraîl û Îranê de bide.
Her wekî din gelek welatên Ereb û Ewropayê jî heman awayî têkîldarî êrişa Îsraîlê daxuyanî dan û banga rawestandina rageşiyê kirin.
