Piştî êrişa Amerîka li ser navendên nukleerî yên Îranê gelek helwest derketin.
Serokê Enerîka yê DYE’yê Donald Trump got, bi qasî ku ji dîmenên peykê têne dîtin, xisareke gelekî mezin li hemû navendên nukleerê yên Îranê bûye.
Binyamin Netanyahu jî dibêje ew ê li Îran û Xezayê bi xurtî karê xwe dewam bikin.
Îranê jî diyar kir ku ew ê bersiva bi biryar bidin.
Şerê di navbera Îran û Îsraîlê her diçe girantir dibe û her du alî li dijî hev êrişên dijwar pêk tînin.
Serokê DYE’yê Donald Trump piştî bombabarana navendên nukleerî yên Îranê li ser medya dîjîtal daxuyaniyek da û wiha got:
“Bi qasî ku ji dîmenên peykê têne dîtin, xisareke gelekî mezin li hemû navendên nukleerê yên Îranê bûye. ”
Rubio di mijara Tengava Hurmuzê de hişyarî da
Wezîrê Karên Derve yê DYE’yê Marco Rubio jî hişyarî da Îranê ku dest ji meyla xwe ya girtina Tengava Hurmuzê berde ku yek ji pênc parên petrola hilberandî ya cîhanê jê derbas dibe û wiha got:
“Eger vê bikin ev yek wê ji bo wan bibe întihara aboriyê, em jî dikarin li hemberî vê yekê tedbîran bigrin.”
DYE’yê bang li welatiyên xwe kir ku hîn bêhtir baldar bin
Washingtonê piştî êrîşa roja Yekşemê ya navendên nukleerê yên Îranê û gefa Tehranê ya bersivdayinê, bi daxuyaniyek nîviskî bang li welatiyên xwe kir ku hîn bêhtir baldar bin.
Wezareta Karên Derve pêşniyarê li welatiyên Emerîkî yên li çar aliyên cîhanê dike ku hîn bêhtir baldar bin.
Îsraîlê li navenda leşkerî ya li Kirmaşanê xist
Artêşa Îsraîlê sibeha Duşemê di roja 11’emîn a şerê navbera herdu welatan de ragihand ku li navendên binesaziya leşkerî yên Îranê xistiye.
Netanyahu: Em ê li Îran û Xezeyê bi xurtî karê xwe dewam bikin
Serokwezîr Binyamin Netanyahu êvara Yekşemê di civîneke çapemeniyê de anî ziman ku Îsraîl wê li Îran û Xezeyê ‘bi tam kapasîteya xwe’ karê xwe dewam bike.
Îran: Em ê bersiva bi biryar bidin
Ajansa nûçeyan a li Îranê ku Erebî weşanê dike, ragihand ku fermandarê artêşa Îranê gotiye:
“Emerîkiyan dema ku sûc kirin her carê bersiveke bi biryar wergirtin, vê carê jî wê heman tişt bibe.”
Rojnameya Al Akhbar a Lubnanê jî ragihand ku milîsên alîgirê Îranê yên li Iraqê xwe amade dikin ku bersiva êrîşa Emerîkayê ya li ser navendên nukleerê bidin.
Her wiha Çavkaniyên Lubnanî jî daxuyanî dan rojnameya Eşarq El Ewsat û diyar kirin ku Hîzbûllah di helwesta xwe de bi biryar in ku tevlî şerê bi Îsraîlê re nebe.
