Endamê Konseya Rêveber a KCK’ê Mûstafa Karasû anî ziman ku tecrîdkirina Rêber Apo bandorê li rêveçûna pêvajoyê dike, lawaz dike û got:
”Rêber Apo hîn jî nikare bi rengekî çalak tevlî pêvajoyê bibe, gaveke xweşbîn nehatiye avêtin”.
Mûstafa Karasû diyar kir ku divê dewleta Tirk tavilê pêwîstiyên pêvajoyê bi cih bîne û rêber Apo azad bibe”.
Endamê Konseya Rêveber a KCK’ê Mûstafa Karasû derbarê banga rêber Apo a Aştî û Civaka Demokratîk, bûyerên li Tirkiye û Rojhilata Navîn ji Medya Haber TV re nirxandin kir.
Destpêkê Mûstafa Karasû behsa tecrîda li dijî rêber Apo kir û wiha got:
Tecrîda li dijî Rêber Apo hîn jî dewam dike.
Soza ku Devlet Bahçelî da, mafê hêviyê, rakirina tecrîdê, tevlîbûna Rêbertî bi rengekî çalak li vê pêvajoyê hîn pêk nehatiye.
Ji ber vê yekê, pêvajoya aştî û civaka demokratîk, zêde nikare bi pêş ve biçe.
Rêya pêkanîna vê yekê je ew e azadiya Rêber Apo ye. Bicihanîna mafê hêviyê ye. Afirandina derfetên azad ên kar ji bo Rêber Apo ye.
Mûstafa Karasû: Em piştgirî didin vê pêvajoyê û dixwazin bibin serî
Karasû bal kişand li ser pêvajoya niha tê meşandin û wiha bi lêv kir:
Rêbertî dixwaze vê pêvajoyê bimeşîne. Lê belê hewldan, nêt û keda Rêbertî jî heta cihekî ye.
Bêguman em dixwazin vê pêvajoyê bibin heta dawiyê, bibin heta encamê, em piştgiriyê didin.
Di vê mijarê de di helwest û nêzîkatiya me de ti kêmasî nîne. Em zelal in. Lê belê yê ku pêwîstiyên wê bi cih nîne, hikumet e.
Mûstafa Karasû: Divê dewleta Tirk destwerdanê li pêvajoyê bike
Mûstafa Karasû da zanîn ku piştî banga rêber Apo PKK’ê agirbest ragihand û wiha anî ziman:
Niha kongre bû, biryara fesixkirinê hate dayin, biryara bidawîkirina têkoşîna çekdarî hate dayin, li gel vê yekê jî meşandina vê êrîşê bi rengekî eşkere provokasyon e.
Di nava dewletê de beşek dixwaze vê pêvajoyê xera bike.
Wê demê divê hikumeta ku vê pêvajoyê dimeşîne jî dest li vê yekê werde. Divê li vê temaşe neke.
Mûstafa Karasû: Rêber Apo bi nêrîneke nû ya felsefî cîhanê dinirxîne
Karasû anî ziman ku kûrbûnên Rêber Apo pir pir girîng in û got:
Rêbertî bi nêrîneke nû ya felsefî cîhanê dinirxîne, bûyeran dinirxîne, sosyalîzmê dinirxîne, demokrasiyê dinirxîne, têkoşînê dinirxîne. Nêrîneke felsefî ye.
Rêber Apo dibêje: “Ez hewl didim ku aqilê Kurdan biafirînim.” Ev pir girîng e.
Berê, aqilê Kurdan her tim xizmeta kesên din dikir. Berjewendiyên xwe nedidît, xizmeta xwe nedikir.
Divê hemû Kurd hewl bidin ku vê aqlê Kurd fam bikin.
Mûstafa Karasû rexneyên tûnd li axaftinên Alî Kemal Ozcan kir
Mûstafa Karasû rexneyên tûnd li gotinên Alî Kemal Ozcan ên ku dibêje:”Min Karasû guhdar kir. Derket holê ku Rêbertiya me dixapînin.” kir û wiha bersiv da.
Alî Kemal Ozcan me wekî ku li pêşiya pêvajoya çareseriyê ya Rêbertiyê asteng nîşan dide.
Min got, divê her kes bizanibe ku Rêber Apo ne dixapîne û ne jî tê xapandin. Divê her kes vê rastiyê bizanibe.
Ev axaftinên bê bingeh asta Alî Kemal Ozcan nîşan dide. Li ser hevalên din jî derew û tiştên bêbinî dibêje.
Di hişê wî de pêşdaraziyek heye. Divê dev ji vê nêzîkatiyê berde.
Ez vê jî bêjim, Kemal Ozcan mirovekî balkêş e, lê bi rastî tiştan pir serûbin dike, raya giştî pir dixapîne, hewl dide ku di raya giştî de têgihiştinek neyînî li ser me biafirîne.
