Radyûya dengê Elmaniya DW ser revandin û binpêkirinên derheqê jinên Elewî raporek weşand.Di wê raporê de çîrok jineke hatibû revandin û piştre hate berdan eşkere kir.Her wiha bi pirsa “rola jin di Sûriya nû” xwe gihand gelek çalavanên mafên jinan û nêrînên wan wergirt. Çalakvanan diyar kirin ku gerek ked û rola jinên ku pêşengiya şoreşê kirine neyê paşguhkirin û xwarin.
Her roj kuştin, her roj revandin û êşkencekirin.
Rewşa Sûriyê bi hatina desthilata nû re ev e.
Bûyerên windabûn an jî revandina jinên Elewî li Sûriyê hema hema rojane têne tomar kirin.
Radyûya dengê Elmaniya DW xwe gihand hin çalakvanên Sûrî û malbatên ku li benda keçên xwe ne û agahî belav kir.
DW’yê xwe gihand jineke ku piştî revandinê vegeriya malê û ser çawanî, sedem û binpêkirinên anîne serê wê agahî girt.
Ew jina han navê wê Nûra ye, nêzî mehekê di jêrzemînek de ma.
Li wir gelek cureyên êşkenceya fîzîkî û psîkolojîk dîtiye û wiha qala çîroka xwe dike:
Her roj heqaret û lêdanên giran li min dihatin kirin heta ku ez ser hişê xwe çûm.
Xwestin kaxezekê bi min bidin îmezekirin û min bizewicînin kesekî.
Bê guman min red kir û dema min ev kir wan hîn bêtir êşkence li min kirin.
Nûra di îfadeya xwe de diyar kir ku di dema binçavkirina xwe de rastî heqaretên mezhebî hatiye û jê re gotine” kafir.”
Çeteyên ku Nûra revandin, dîmenê wê yê dema di bin îşkenceyê de ji malbata wê re şandin da ku zextê li wan bikin ku fîdye bidin.
Piştî malbatê fidî dan Nûra vegeriya mala xwe.
Heta niha bêhtirî 40 jin hatine revandin
Nûra ne yekem jinan Elewî ya tê revandin û êşkence li wan tê kirin.
Ne tenê DW, Reuters û çend dezgehên din ên medyayê yên navneteweyî lêpirsînên li ser vê diyardeyê weşandine.
Jinên Elewî wekî çekek şer têne bikar anîn da ku bi rêka wan tirsek nava pêkhateyên Sûriyê çêbibe.
Li gorî çalakvanên mafên mirovan heta niha bêhtirî 40 jin hatine revandin.
Çalakvanên jin: Nabe rola jinan di Sûriya nû de were paşguhkirin
Li ser pirsa DW’ya rola jin di Sûriya nû de gelek çalakvanên jin bersiv dan.
Rojnemevan û Parêzvana mafê Jinan Zêna Qenewatî dibêje, Rola jinan tê paşguhkirin.
Her wiha diyar dike ku nabe rol jinên Sûriyê yên pêşengiya Şoreşê kirin têk biçe.
Çalakvana mafê jinan Miya El Rehbî jî diyar kir ku gelek jinên bi hêz hene ku dikarin pêşeroja Sûriyê ber bi demokrasiyê ve bibin.
Her wiha daxwaz kir ku rola wan neyê paşguhkirin.
Komîsyona Lêpirsîna Navneteweyî ya Serbixwe ya li ser Sûriyê ji DW’yê ragihand ku ew ê di demek nêzîk de raporek berfireh li ser dozên revadina jinan ku wan bi xwe çavdêriya wê kiriye pêşkêş bike.
