Rêveberiya Xweseriya Demokratîk daxuyand “Em bi fikareke mezin geşedanên li parêzgeha Siwêdayê, êrişên rasterast û gefên li ser ewlehî û silametiya xelkê wê dişopînin.”
Di daxuyaniyê de wiha tê gotin:
“Rêveberiya Xweseriya Demokratîk a Herêma Bakur û Rojhilatê Sûriyeyê bi fikareke mezin geşedanên li parêzgeha Siwêdayê, êrişên rasterast û gefên li ser ewlehî û silametiya xelkê wê dişopîne. Tê zanîn ku gelê Sûriyeyê di pêvajoyeke hestiyar re derbas bibe. Gel hêviya bidawîbûna êşa demdirêj dike ku serdemên despotîzmê ferz kirine. Her wiha bi hêviya siberojekê ne ku rûmet, edalet û wekheviya di navbera hemû sûriyeyiyan de mîsoger bike.
Rêveberiya Xweser: Em binpêkirinên li dijî xelkê me yê Siwêdayê şermezar dikin
Em Rêveberiya Xweser binpêkirinên ku li dijî xelkê me yê Siwêdayê tên kirin, şermezar dikin. Ev kiryar bi hemû pîvanên xwe yên nîştimanî û mirovî nayên qebûlkirin, ku li dijî pêkhateyeke resen ê gelê Sûriyeyê ye. Armanc jê ew e ku bi rêya tirsandina sivîlan û avakirina hewayekî tevlihevî û fitneyan, îstiqrara civakî qels bike. Ya ku li Siwêdayê rû dide, ne tenê li dijî herêmekê ye, lê belê yekitiya sûriyeyiyan, daxwaza wan a avakirina dewleteke azad, demokratîk a li ser pirrengiyê ye.
Ezmûnan îsbat kir ku tundî ne rêya çareseriyê ye, lê tevlihevî û nakokiyên di navbera hikumetê û gel de zêdetir dike.
Rêveberiya Xweser: Em tevahiya piştgiriya xwe bi xelkê me yê Siwêdayê re piştrast dikin
Li ser vî bingehê, em tevahiya piştgiriya xwe bi xelkê me yê Siwêdayê re piştrast dikin. Em bang li tevahî hêzên nîştimanî yên Sûriyeyî dikin ku ji bo rawestandina van kiryar û êrişên li ser sivîlan di rêzekê de bisekinin. Ji bo parastina aştiya navxweyî û tevna civakî ya Sûriyeyî ku bingeha her projeyeke nîştimanî ye jî kar bikin.
Em teqez dikin ku divê rêz li pirrengiya nîştimanî ya Sûriyeyê were girtin, divê mafên tevahiya pêkhateyan bêyî cûdabûn werin naskirin, ji xîtaba nefretê an kiryarên li dijî pêkhateyekê, çi bi sedemên siyasî, an olî û an jî neteweyî bin dûr bikevin. Sûriyeya ku em behsa wê dikin, divê ji hemû gelên wê bêyî cuda re be. Divê Sûriyeya nû li ser esasê demokrasiyê be ya ku beşdariya çalak a hemû gelê wê di rêvebirina kar û barên welatê de mîsoger bike.
Rêveberiya Xweser: Divê li hember rûdanan zimanê aqil û berpirsyariyê esas were girtin
Careke din em dibêjin, divê li hemberî rûdanan zimanê aqil û berpirsyariyê esas were girtin. Em bang li hemû aliyên kuyekitiya Sûriyeyê û silametiya gelê wê dixwazin, dikin nêzîkatiyên realîst bipejirînin ku xwezaya civaka Sûriyeyê di ber çavan re bigre, û ji bo avakirina modeleke siyasî, demokrasî ya li ser edalet, wekhevî û mafên mirovan be, bixebitin.”
