Li eyaleta Teksasê ya başûrê Amerîkayê, barana zêde ya ji nişka ve di 4’ê Tîrmehê de bû sedema lehiyê.
Zêdetirî 129 kesan jiyana xwe ji dest da bûn, ji bo xeteriya lehiyek nû hişyarî hat dayîn.
Her wek li Spanyayê jî ji ber barana zêde 2 kes winda bûne.
Li aliyê din li Endonezyayê 6.7 pileyî erdhej pêk hat.
Ji ber barana dijwar a piştî lehiyên 4’ê Tîrmehê ku 129 kesan jiyana xwe ji dest dan, li Teksasê hişyariyên nû yên lehiyên bilez hatin dayîn.
Servîsa Hewayê ya Neteweyî ji bo herêma San Saba ya li başûrê rojhilatê eyaletê hişyariyek ji bo lehiyên bilez da.
Hat ragihandin ku hin wesayît di nav ava lehiyê ya li herêma Suttonê de bin av bûne, û ji bo niştecihên hin deverên Suttonê fermana valakirina mecbûrî hat dayîn.
Di vê navberê de, lêgerîna nêzîkî 150 kesên ku di lehiyên ku di 4’ê Tîrmehê de li herêma Kerr qewimîn de winda bûne demkî hatiye rawestandin.
Daîreya Polîsan a Kerrville li ser medyaya civakî ev tişt got:
“Em ê di demek nêzîk de bêtir agahdarî bidin, lê divê hemî tîmên lêgerînê heta agahdariyek din xeta çemê vala bikin.”
Li Spanyayê ji ber lehiyê 2 kes winda bûn
Li Spanyayê jî ji ber baran û bahoza zêde lehî rabû.
Di radyoyekî Spanyayê de hat ragihandin ku 2 kesên ku tê bawerkirin ku ji ber bilindbûna ava Çemê Foix, winda bûne, nehatine dîtin, û hewldanên lêgerîn û rizgarkirinê berdewam dikin.
Rayedaran ragihandin ku Yekîneya Alîkariya Lezgîn a Leşkerî ji ber lehiyê li gelek bajarên herêma Aragonê ya ku ji tofanê bandor bûye, hatiye şandin.
Rayedaran diyar kirin ku 8 kesên ku di mal û wesayîtan de asê mabûn hatine rizgarkirin.
Her wekî hat ragihandin ku hin rêyên li herêmê hatine girtin, û elektrîk li ser zêdetirî 600 malbatan qut bûye.
Li Endonezyayê bi mezinahiya 6.7 pileyî erd hejiya
Li aliyê din peravên Giravên Maluku yên li rojhilatê Endonezyayê bi mezinahiya 6.7 pileyî erd hejiya.
Li gorî daxuyaniya ku ji aliyê Saziya Lêkolînên Jeolojîk a Amerîkayê ve hate dayin, erdhej bi dema herêmî saet di 12:49’an de bi 80 kîlometreyî li binê erdê rû da.
Bajarê Tual ê li eyaleta Maluku bi ku 177 kîlometreyan dûrî navenda erdhejê ye, bi erdhejê hesiya.
Navenda Hişyariya Tsunamiyê ya Pasîfîk ragihand ku piştî erdhejê metirsiya tsunamiyê nîne.
