Bi sedan şêniyên kantona Tebqayê cenazeyê şervanê QSD’ê Murad Qenber oxir kirin û careke din soz da ku rêya şehîdan bidomînin.
Bi sedan şêniyên kantona Tebqayê û koçberên Efrîn û Şehbayê li goristana şehîdan a Tebqayê û tev li merasîma oxirkirina cenazeyê şervanê Hêzên Sûriya Demokratîk (QSD) Murad Qenber bibin. Şehîd Murad 17`ê Tîrmehê şehîd bûbû.
Endamên Rêveberiya Xweser a Demokratîk, saziyên sivîl û leşkerî, rêxistinên civaka demokratîk, partiyên siyasî, saziyên olî, Hêzên Ewlekariya Hundirîn, şêx û rûspiyên eşîran beşdarî merasîmê bûn.
Piştî ku ji aliyê hêzên Rizgariya Efrînê (HRE) ve merasîmeke leşkerî hate lidarxistin, ji fermandarên HRE’yê Devram Efrîn axivî û berdewamiya rêya şehîdan bi ruhekî bilind ê têkoşînê piştrast kir û soz da ku destkeftiyên şehîdan biparêzin.
Serokê Al El Beyt ya Tebqayê Ednan Ilêwî axivî û bal kişand ser fedakariyên mezin ên şehîdan û got ew mertalên parastina gelên Bakur û Rojhilatê Sûriyeyê ne.
Meta şehîd, Zeyneb Qenber jî li ser navê malbatê soza xwe ya berdewamkirina têkoşînê heta rizgarkirina Efrînê û xurtkirina projeya Rêveberiya Xweser li seranserî Sûriyeyê nû kir.
Zeyneb diyar kir ku hewldanên şikandina îradeya gel wê bi ser nekevin.
Di dawiyê de wesîqeya şehadetê ji aliyê endama Meclisa Malbatên Şehîdan Irûba Abid ve hate xwedin û radestî malbata şehîd hate kirin.
Piştre cenazeyê şehîd di nav dirûşmên berdewamiya rêya şehîdan de hate veşartin.
