Li gorî ajansa Yonhap, di daxuyaniyekê de ku ji hêla Rêveberiya Meteorolojiyê ya Koreyê (KMA) ve hatî dayîn, ku navenda wê li paytext Seulê ye, agahdariya li ser daneyên germahiya Tîrmehê hat parvekirin.
Di daxuyaniyê de hat diyarkirin ku germahiya navînî ya meha borî li seranserê welêt 27.1 pile hatiye pîvandin.
Di daxuyaniyê de hat destnîşankirin ku ev germahî 0,6 pile li jêr germtirîn Tîrmeha sala 1994’an e, ku ev jî duyemîn germahiya Tîrmeha dîroka welêt e.
Portekîz li dijî şewatên daristanan tekoşîna xwe didomîne
Her wiha Li Portekîzê ji ber germahiya zêde ku du roj in di rewşa awarte de ye û hewl tê dayîn ku şewatên daristanan kontrol bikin.
Li bakurê welêt li çar cihan, bi taybetî li herêmên Vila Real û Mondim Basto, agirên mezin ên çalak hene.
Di daxuyaniyên rayedarên hikûmeta herêmî de hat ragihandin ku bi tevahî zêdetirî 800 kes ji bo vemirandina agirên daristanan li bakurê welêt dixebitin, 282 wesayîtên bejahî û 9 balafirên jî destekê dide wan.
Li Vila Realê, ku agirê herî mezin lê berdewam dike, 522 agirkuj di hewldanên vemirandina agir de beşdar dibin.
Di heman demê de tê gotin ku komeke ji 16 kesan ji tîma Yekîneya Taybet a li Letonyayê ji bo piştgiriyê gihîştine herêmê.
Rayedar dibêjin ku agirkujên ku ji dawiya hefteyê ve li qadê ne, westiyane û bang li hikûmetê dikin ku hêzên zêde bişîne.
Li Spanyayê ji ber germahiya zêde kesek mir
Ji aliyekî din, germahiya zêde bandorek neyînî li cîranê Portekîzê, Spanyayê jî dike.
Ji ber germahiya zêde ya ku gihîştiye 42 pileyan, li neh herêmên xweser ên li seranserê Spanyayê hişyariya asta navîn hatiye ragihandin.
Hat ragihandin ku li bajarê Badajozê yê li başûrê welêt kesekî 85 salî ji ber germahiya zêde jiyana xwe ji dest daye.
Her çend agirên daristanan li Spanyayê hatine kontrolkirin jî, Wezareta Karên Hundir hişyarî da ku metirsiya agirên nû heye”.
Pisporên meteorolojiyê dibêjin ku pêla germê, ya duyemîn a vê havînê, dê heta dawiya hefteyê bandorê li Nîvgirava Îberî bike.
Li Îranê ji ber germahiya zêde saziyên fermî hatin girtin
Li gel vê yekê li Îranê jî ji ber germahiya zêde û zêdebûna xerckirina enerjiyê li 31 eyaletan 15 saziyên fermî hatin girtin.
Hat diyar kirin herî kêm 15 eyaletên Îranê tevî paytext Tehran, saziyên fermî dê roja Çarşemê werin girtin.
Ev biryar li ser daxwaza Wezareta Enerjiyê hat dayîn.
Ji ber pêla germahiyê ku ji Tîrmehê û vir ve didome li tevahiya welat gelek car dibe sedema qutbûna av û elektrîkê.
Depoyên avê li seranserê welêt kêm dibin, di heman demê de pirsgirêkên binesaziyê, gendelî û krîzê kûrtir dibin.
Îran îsal bi hişkesaliya herî giran a sedsalê re rû bi rû ye.
