Di navbera Rûsya û Ukraynayê şer û dîplomasî di nava hev de dimeşe.
Li gorî Kremlînê Putîn amadeye ku bi Zelenskî re bicive.
Li hêlek din jî Ewropa şert û mercên radestkirina patriotan ji bo Ukraynayê eşkere kir.
Di 1’ê Tebaxê de, Serokê Ukraynayê Volodymyr Zelenskî careke din ji Serokê Rûsyayê Vladimir Putin re hevdîtinek rasterast, di asta lîderan de pêşkêş kir. Kremlinê bersiva vê vexwendinê da.
Berdevkê Kremlinê Dmitry Peskov ji medyaya Rûsyayê re got Putin amade ye piştî ku amadekariyên pêwîst ên di asta pisporan de biqedin, bi Zelenskî re bicive.
Her wiha Peskov behsa îhtîmala hevdîtinek di navbera Putin û Nûnerê Taybet ê Serokê Amerîkayê Steve Witkoff de kir.
Zelenskî berê wiha gotibû:
“Em dizanin kî li Rûsyayê biryaran dide, û em dizanin kî dikare vî şerî biqedîne. Hemû cîhan ji vê yekê haydar e.
Ukrayna pêşniyar dike ku ji daxuyanî û civînên asta teknîkî ber bi danûstandinên rasterast ên li ser asta lîderan ve biçe.
Amerîka jî ev pêşniyar kir û Ukrayna piştgirî da wê. Niha Rûsya divê amade be.”
Zelensky: Divê hevdîtin di asta lîderan de pêk were
Berê, di dema danûstandinên Stenbolê de, Ukrayna pêşniyar kiribû ku civînek di asta lîderan de bi navbeynkariya Serokê Amerîkayê Donald Trump û Serokkomarê Tirkiyê Recep Tayyip Erdogan were kirin.
Di vê navberê de, Donald Trump vê dawiyê diyar kir ku ew ê bi Zelenskî û Putin re bicive.
Dema ku rojnamevanek pirsî ka ji bo pêkanîna vê civînê çi hewce ye, Trump wiha bersiv da:
“Divê ev civîn demek dirêj berê bihata kirin. Civînek dê hebe, lê divê ew du an sê meh berê bihata kirin.”
Ewropa mercên radestkirina patriotan ji bo Ukraynayê eşkere kir
Li aliyê din Dewletên Yekbûyî yên Amerîkayê û hevalbendên Ewropî li ser peymanek nû danûstandinan dikin ku wê rê bide Ukraynayê ku bêtir pergalên parastina hewayî yên Patriot bi dest bixe.
Welatên NATO’yê plan dikin ku pergalên heyî veguhezînin Kîevê û zû ji Amerîkayê yên yedek bistînin.
Ev biryar girîng e ji ber ku Ukrayna, li gorî şeş bataryayên ku niha hene, hewceyê herî kêm 10 bataryayên din e.
Peyman bi gelek pirsgirêkan re rû bi rû ye.
Welatên Ewropî, bi taybetî Almanya, ji Washingtonê garantiyên nivîskî dixwazin ku pergalên nû dê di nav heşt mehan de herî zû werin radest kirin.
Bêyî van garantiyan, hevalbend ji qelsbûna parastinên xwe, nemaze baskê rojhilat ê NATO’yê, ditirsin.
Pirsgirêka sereke hilberîna hêdî ya Patriotan e.
Pergalek tenê bi qasî milyarek dolar lêçûn e, lê her moşekek çar milyon dolar lêçûn e.
Hêjayî gotinê ye ku li Ewropayê, Patriot tenê li çend welatan wekî Almanya, Yewnanistan, Hollanda, Polonya, Romanya û Spanyayê hene û depoyên wan sînordar in.
Li herêmê bi qasî du beş batarya hene.
Hin ji wan ji bo Ukraynayê hatine veguheztin, yên mayî jî binesaziya NATO’yê diparêzin.
