Xelkê bajarê Hesekê û koçberên Efrînê 390 şehîdên di cih û dîrokên cuda de şehîd bûne bi bîr anîn û got ew ê rêça şehîdan bişopînin û armancên ji bo wan şehîd ketine pêk bînin.
Meclisa Malbatên Şehîdan a bajarê Hesekê bi hevkariya Meclisa Malbatên Şehîdan a Koçberên Efrînê ji bo 390 şehîdên li cihên cuda di mehên Gulan, Hezîran, Tîrmeh û Tebaxê de şehîd bûne, li Hola Reşo ya li taxa Mişêrfê ya Hesekê ya kantona Cizîrê merasîma bibîranînê organîze kir.
Li holê wêneyên şehîdan, alên Meclisa Malbatên Şehîdan, wêneyên Rêber Abdullah Ocalan hatin daliqandin. Di merasîmê de bi sedan malbatên şehîdan tevî hildan wêne û wesîqeyên şehadeta zarokên xwe amade bûn.
Di merasîmê de endamê Meclisa Malbatên Şehîdan a Hesekê Ehmed El Herîs axivî û tevahî şehîdên şoreşê di şexsê fermandarê şoreşa Rojava-Bakur û Rojhilatê Sûriyeyê şehîd Nûreddîn Sofî de bi bîr anîn.
El Herîs diyar kir ku îro bi saya fedakariyên şehîdan û berxwedana şervanan Herêma Bakur û Rojhilatê Sûriyeyê ewle û îstîqrar e û got: “Em malbatên şehîdan ên ji hemû pêkhateyan dê li ser rêça zarokên xwe bin û destkeftiyan wan biparêzin.”
Endamê Desteya Têkiliyên Giştî ya Meclisa Leşkerî ya Hesekê Hesen Berko fedakariyên şehîdan li hember komployên li dijî herêmê bi bîr xistin û bal kişand ser rola mezin a gel di piştevaniya şervanan de û got: “Bendava Tişrînê mînaka zelal a berxwedana gel û şervanên me bû.”
Berko di dawiyê de anî ziman ku ew ê li ser rêça şehîdan bin û dev ji armancên ji bo wan şehîd ketine bernedin.
Di dawiyê de helbestvan Mehmûd Cewad ê ku bavê şehîd Mihemed Cewad e helbestek xwend û dûre jî sînevîzyonek li ser 390 şehîdan hat pêşkêşkirin.
