Hevserokê Giştî yê DEM Partiyê Tûncer Bakirhan bersiva gefên rayedarên dewleta Tirk a dagirker yên li ser Rojavayê Kurdistanê da.
Bakirhan got, “Bendewariya bi mîlyonan Kurdanên li Bakurê Kurdistanê ew e ku Tirkiye maf, rûmet û statuya Gelê Kurd ên li welatên cîranê Tirkiyê biparêze. Daxwaza teslîmbûnê li wan kirin ne li gorî edalet û aştiyê ye”
Rayedarên dewleta Tirk di vanê demên dawiyê de gefên êriş û dagirkirinê yên li dijî Bakur û Rojhilatê Sûriyê zêde kirine.
Herî dawî Omer Çelîk yê AKP’yî û Serokê Partiya Tevgera Neteweperest Dewlet Bahçelî gefa êrişan xwarin.
Hevserokê Giştî yê DEM Partiyê Tûncer Bakirhan ji Rojnameya Yenî Yaşam’ê re axivî û bersiva van gefan da.
“Daxwaza teslîmbûna Kurdan kirin, ne Exlaqî û ne jî wijdanî ye”
Tûncer Bakirhan diyar kir tiştên ku hê beriya çend mehan li Sûriyê qewimîn divê neyên ji bîr kirin û bi bîr xist ku êrişên li dijî civaka Elewî û Durziyên li Siwêdayê rê li ber kuştina bi hezaran mirovên bê guneh vekir.
“Komkujiyên sîstematîk û êrişên DAIŞ’ê ên ku dewam dikin, nîşan dide bê ka gelên li herêmê di fikarên xwe yên ewlekariyê de çiqas mafdar in.
Ji Kurdan û ji civakê din ku hê misogeriya ewlekariya wan tune, daxwaza helandina wan ya di nava avaniyeke ku bi pêkanînên xwe baweriyê nade û karektera wê ya demokratîk zelal nîne, ne exlaqî û ne jî wijdanî ye.
Çi misogeriya wê heye, trajediya ku hate serê Elewî û Durziyan, neyê serê Kurdan?”
Çareseriya pirsgirêkan ne bi gefên Operasyonan, bi heq û hiqûqê pêkan e”
Bakirhan destnîşan kir çareseriya pirsgirêkan ne bi gefên operasyonan, li ser bingeha heq û hiqûqê pêkan e û wiha dewam kir;
“Bêyî ku garangiya statuya Kurdan û mafên wan bên dayîn, daxwaza teslîmbûnê li wan kirin ne li gorî edalet û aştiyê ye.
Tê xwestin ku li gorî peymana 10’ê Adarê tevbigerin. Ez dipirsim; Navê Komara Erebî ya Sûriyê li gorî rihê Peymana 10’ê Adarê ye?
Bêyî ku ji Kurdan, Durziyan, Elewiyan û Tirkmenan bipirsin ragîhandina hikumetê û destûra bingehîn gelo li gorî peyamanê ye?
Lê ji ber van polîtîkayên xwe aliyê ku li gorî vê peymanê tevnagere tune dihesibîne, Şam e.”
“Bendewariya Kurdên li Bakur ji Tirkiyê ew e ku statuya Kurdên li welatên din biparêze”
Bakirhan diyar kir bendewariya bi mîlyonan Kurdanên li Bakurê Kurdistanê ew e ku Tirkiye maf, rûmet û statuya Gelê Kurd ên li welatên cîranê Tirkiyê biparêze û got,
“Hûn çima bi fermî bi şandeya Bakur û Rojhilatê Sûriyê re hevdîtinan nakin.? Çima wezîrên di hikumetê de ji pêvajoya aştî û çareseriya li welatê xwe zêdetir bi karên Sûriyê re mijûl dibin?
Madem ev gaveke stratejîk e, û wê qedera welat û herêmê biguhere çima gotinên rasteqîn nayên kirin.?
Aqilê ku bang li Birêz Ocalan kir ku li meclisê biaxive divê ji pêşniyarên wê yên çareseriyê re jî vekiribe û niqaş bikin.
Birêz Ocalan ji bo Tirkiyê, Sûriyê û hemû Rojhilata Navîn perspektîfên aştiyane pêşkêş dike.”
