Bi hezaran şêniyên bajarên Qamişlo, Amûdê, Til Hemîs û Tirbespiyê yên kantona Cizîrê ji bo azadiya fîzîkî ya Rêber Abdullah Ocalan mîtîngek li dar xist û got “Eger Rêber Apo azad nebe, destkeftiyên me dê di xetereyê de bin.”
Bi pêşengiya Însiyatîfa Gel a Bajarê Qamiloyê yê kantona Cizîrê, şêniyên bajarên Qamişlo, Amûdê, Til Hemîs û Tirbespiyê ji bo azadiya fîzîkî ya Rêber Abdullah Ocalan mîtîngek li dar xist. Mîtîng bi dirûşma “Em ê têkoşîna xwe bilind bikin, Rêber Apo fîzîkî azad bikin” li ber Stada Şehîdên 12’ê Adarê ya Qamişloyê pêk hat.
Li qada mîtîngê wêneyên Rêber Abdullah Ocalan, alên TEV-DEM, QSD, Kongreya Star, Rêveberiya Xweser hatin daliqandin.
Bi hezaran pêkhateyên Kurd, Ereb û Suryan beşdarî mîtîngê bûn. Mîtîngê bi dirûşma “Bê Serok jiyan nabe” û tilîliyên jinan û deqeyeke rêzgirtinê dest pê kir. Silav ji Rêber Abdullah Ocalan re hatin şandin û keda şehîdan hat bîranîn.
Di mîtîngê de endamê Konseya Rêveber a Hevserokatiya PYD’ê Aldar Xelîl axivî, silav li gel kir û şehîd bîr anîn. Aldar Xelîl bal kişand ser girîngiya çalakiyê û got: “Ji me re dibêjin çima hûn dibêjin azadiya Serok azadiya me ye, ji ber ku em li azadiya xwe digerin, li vîna xwe ya azad digerin. Serok jî pêşengiya wê dike.
Dema em bang nekin tê wateya em koletiyê dipejirînin. Vaye dewleta Tirk helwesta wê tê zanîn, xwe li ser tunekirina Kurdan ava kiriye. Naxwaze li herçar parçeyên Kurdistanê Kurd bibin xwedî vîn û destkeftî. Serok Apo û vê tevgerê 53 sal têkoşiya ku vê nêzîkatiyê biguhere. Yê ku Tirkan bîne xeta azadiyê Serok Apo ye.
Ev rastiyek e. Ji bo pirsgirêka Sûriyeyê çareser bibe, pêwîste ya Bakur çareser bibe. Ji ber ku Enqere destwerdana Şamê dike. Eger Rêber Apo azad nebe, destkeftiyên me di xeteriyê de ne, ji ber dewleta Tirk nahêle Şam beşdarî çareseriyan bibe.”
Berdevka Kongreya Star Gulistan Gulo silav li tevahî gel kir û got: “Di dirêjiya 14 salên şoreşê de vî gelî şer û berxwedaniyek mezin kir. Bi hezaran şehîd û birîndar dan.
Ji bo nasnameya gelê me bû. Ne ji bo nasenekirina nasnameya jinan û gelan bû. Dewleta Tirk û hikumeta demkî ya li Şamê dixwazin vîna vî gelî ji nedîtî ve bên. Banga Rêber Apo pir zelal bû. Got, werin em bihevdû re bi biratî û dostanî bijîn. Lê dewleta Tirk û hevkarên wê tu gav neavêtine. Pirsgirêkên Rojhilata Navîn bi azadiya Rêber Apo ve girêdayî ye.
Rêber Apo got, şoreşa Rojava xeta min a sor e. Em jî dibêjin şoreşa Bakur û Rojhilatê Sûriyeyê xeta sor e. Azadiya Rêber Apo azadiya gelê bi rûmet e, azadiya gelê Rojhilata Navîn e. Hêzên navnetewî qala ‘mafê hêviyê’ dikin, em azadiya Rêber Apo dixwazin. Ew tenê dikare pirsgirêkên Rojhilata Navîn çareser bike.”
Serokê Meclisa Qebîla Tey Hesen Ferhan bi navê eşîr û qebîleyên Ereb axivî û got: “Em wek Sûriye beriya ku Ereb bin, em dibêjin Rêber Apo doza kurdî gihandiyek asteke cîhanî.
Rêber Apo civaka Kurd, Ereb, Suryan, Tirkmen, xiristiyan, Aşûr û Ermen bi rêxistin kir.
Peymana Rêber Apo ji me re hat, ji bo tevayî eşîr û qebîleyên Ereb bû. Vê peyamê deng veda, ev peyam beriya ku siyasî be mirovî ye.
Wexta em qala pergala nenavendî dikin, nayê wê wateyê em ê xwe ji erdnîgariya Sûriyeyê parçe bikin, erdnîgariya Sûriyeyê ji tevayî gelê Sûriyeyê re ye.”
Piştî axaftinan mîtîng bi dirûşmên “Bijî Serok Apo”, “Bê Serok Jiyan Nabe” bi dawî bû.
